الكرة المصرية

شادي حسين وياسر ريان.. من الأفضل للقلعة الحمراء؟

الأهلي حط إيده خلاص على شادي حسين وأصبح هو أول صفقات الفريق في الانتقالات الصيفية الحالية، أول تدعيم هجومي للمارد الأحمر لكن قصاد دا خسر من مهاجمي الفريق الواعدين جدًا، أحمد ياسر ريان اللي راح الناحية التانية لسيراميكا كليوباترا.

انتقال أحمد ياسر ريان لسيراميكا كليوباترا أثار جدل واسع وسط جماهير الأهلي خصوصًا إنه مهاجم شاب وأصغر في السن من شادي حسين بـ5 سنين تقريبًا، بالتالي يعتبر هو المستقبل فليه تتخلى عنه مقابل شادي حسين.

فلو قارنا فعلًا أحمد ياسر ريان بشادي حسين كفة مين ترجح؟
شادي حسين أثبت جدارته في الدوري المصري ومش موسم واحد بس لكن 3 مواسم على التوالي ففعلًا قدم أوراق اعتماده في البطولة ومش موسم والسلام واختفى بعدها لأ دا أثبت نفسه بشكل مستمر.

شادي حسين على مدار 3 مواسم، كان هو هداف سيراميكا كليوباترا دايمًا وضمن هدافين الدوري، حتى لو أحمد ياسر ريان راح لعب معاه في سيراميكا كليوباترا كان شادي حسين هو اللي منور في الفريق وهو هدف الفريق والأكتر مساهمة في الأهداف بالتالي لما تقارنهم ببعض وهم في نفس الفريق والمنظومة هتلاقي كفته هو اللي راجحة دايمًا.

شادي حسين كمان عنده ميزة إضافية إنه بيقدر يلعب كمهاجم وكمان كجناح شمال، بالتالي هيوفرلك مرونة تكتيكية كبيرة للعيب يقدر يلعب في أكتر من مركز هجومي فتقدر تعتمد عليه وتزود عليه كثافة هجومية، خصوصًا في حالة زي الأهلي دايمًا بيقابل تكتلات دفاعية ضخمة جدًا جدًا.

مهاجم سيراميكا ورغم كبر سنه نسبيًا لكنه لسة قادر يحافظ على لياقته البدنية العالية والمعدل العالي في الجري مأثرش عليه، وكمان بيقدر يلعب برجله اليمين والشمال بجانب إنه مميز في ضربات الراس.
لما نيجي نشوف أحمد ياسر ريان فمش هتلاقي لييه بصمة واضحة تقدر تراهن عليه فيها، حتى مع خروجه للإعارة سواء في تركيا أو سيراميكا كليوباترا مكنش ليه تأثير واضح في الملعب أو أرقام مميزة تقدر تقول إنه مبشر فيها.

كمان أحمد ياسر ريان ميزته الكبيرة في المساحات الكبيرة وكمان ضربات الراس، لكنه مبيقدرش يلعب في المساحات الضيقة زي شادي حسين، وكمان مكنش عنده من الاستمرارية في أي تجربة اللي قام بيهم سواء جوا مصر أو برا مصر، بالتالي هو مازال في خانة اللعيب الواعد مش إنه أثبت نفسه.

اختيار الأهلي بالاتجاه لشادي حسين والتخلي عن أحمد ياسر ريان هو قرار منطقي جدًا واتجاه للي متجرب زي ما بنقول بدل ما تاخد ريسك جديد للعيب مجرد واعد لكنه مأثبتش أي حاجة خالص، وكمان الأهلي أمن نفسه مستقبلًا لو قدم أحمد ريان أي أمارة يقدر يستعيده تاني.

اللي نقدر نأكد عليه إن شادي حسن هو أفضل مهاجم مصري على مستوى التحركات والشراسة الهجومية والشمولية كمان من ناحية اللعب برجليه الاتنين وراس الحربة، والاتجاه لييه هو أفضل اختيار حاليًا.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى