الكرة المصرية

هل يحل الزمالك والأهلي عقبة المشاركات الأفريقية للصفقات الجديدة؟

لسة الأهلي والزمالك شغالين على قدم وساق في الانتقالات الصيفية الحالية عشان يدعموا صفوف الفريق للموسم الجديد، الأهلي عشان يرجع تاني للمنافسة وتعويض خسارة الدوري لموسمين متتاليين لأول مرة من 2004، والزمالك عشان يستمر في طريقه الصحيح وتحقيق البطولات للموسم التالت.

من بين الصفقات اللي حددها الأهلي عشان يدعم صفوفه في الانتقالات الحالية هو لاعب الوسط محمد رضا “بوبو” واللي شايفينه مسؤولين الأهلي إنه هيكون البديل الأمثل للاعب الوسط المخضرم عمرو السولية، وهو دا اللي خلاه في أعلى قائمة طلبات المارد الأحمر في الميركاتو.

الأهلي فعلًا فتح مفاوضات مع نادي فيوتشر عشان يضم محمد رضا “بوبو” واللي أبدى رغبة واضحة في الانضمام للقلعة الحمراء، لكن المفاوضات توقفت عند مرحلة معينة بسبب طلبات فيوتشر واللي شافها مسؤولي الأهلي مبالغ فيها بعد ما وصلت لطلب دخول حوالي 3 لعيبة في الصفقة، وهو اللي رفضه الأهلي ووقف المفاوضات.

الناحية التانية، الزمالك برضو فتح خطوط مفاوضات مع نادي فيوتشر عشان يتعاقد مع لاعبه القديم عمر كمال عبد الواحد في الصيف الحالي، وطلع فعلًا مرتضى منصور قام هنتعاقد معاه الصيف الحالي واتفقنا مع فيوتشر فعلًا.

لكن لحد دلوقتي الزمالك مأعلنش حسم الصفقة رسميًا ومسؤولي فيوتشر بينفوا وجود اتفاق مع مسؤولي الزمالك عشان يتعاقدوا مع عمر كمال عبد الواحد، وبالتالي لسة الصفقة متحسمتش رغم تصريحات رئيس الزمالك.

دلوقتي الأهلي والزمالك قدامهم 24 ساعة بس لحسم الصفقة وإلا فالتعاقد مع الإتنين لعيبة هيكون صعب ويمكن مستحيل، ليه بقا يا ترى؟

لاعبو فيوتشر هيسافروا عشان يبدأوا مهمتهم في الكونفدرالية الإفريقية يوم الإتنين وفعلًا تم استخراج تأشيرات لكل اللعيبة اللي منهم بوبو وعمر كمال عبد الواحد، واللي مشاركتهم في أي دقيقة في الماتشات هتعني فشل الصفقة.

مشاركة بوبو وعمر كمال عبد الواحد في الكونفدرالية مع فيوتشر هيعني عدم إمكانية مشاركتهم في دوري أبطال إفريقيا حال الانضمام للأهلي والزمالك بعد كدا، وهيكون صعب جدًا أي نادي منهم يضم لاعب فيهم من غير ما يلعب معاه إفريقيا.

بالتالي الأهلي والزمالك قدامهم 24 ساعة يكثفوا فيهم محاولاتهم عشان يحسموا التعاقد مع بوبو وعمر كمال على التوالي وإلا فالصفقتين هيدخلوا في منحنى صعب الخروج منه باللاعبين نهائيًا.

صفقتان مهمتان للأهلي والزمالك وكل فريق فيهم في حاجة ملحة جدًا للعيب اللي بيستهدفوه، ودا اللي بيخلينا نتوقع تحرك جامد عشان حسم الصفقة قبل سفرهم والمشاركة في الكونفدرالية الإفريقية عشان ميتمنعوش من المشاركة الإفريقية بعد كدا.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى