الكرة المصرية

برازيلي جديد علي رادار الأهلي لتعويض فشل صفقة مارسينيو .. لجنة التخطيط ترغب في كسب ود كولر

بعيد عن الحدث الأهم فى الوقت الحالى اللى هو كأس العالم، أندية كتير بدأت تحضر ورقها وخطتها لخوض سباق فترة الانتقالات الشتوية اللى جاية…

النادى الأهلى أول الأندية المصرية اللى بدأ التحضير من بدرى لفترة انتقالات الشتاء، وبالفعل خاض جولة من المفاوضات مع البرازيلى مارسينيو…

السويسرى مارسيل كولر واضح جدًا إنه مش ناوى يكمل بمجموعة اللاعبين الموجودة فى صفوف الأهلى فى الوقت الحالى، وإنه بيدور على تدعيمات جديدة علشان تواكب الخطة اللى هو راسمها للفريق فى الفترة اللى جاية…

أخبار كتير أكدت إن فى عدد من لاعيبة الأهلى هيكونو برة الفريق فى الفترة اللى جاية بقرار من السويسرى مارسيل كولر، لأنه بكل بساطة شايف إنهم مش على مستوى التوقعات…

تقارير تانية أكدت إن كولر حدد مجموعة طلبات وعاوزها تتحقق خلال انتقالات يناير، وكان أبرز صفقات الأهلى هو البرازيلى مارسينيو…

نجاح برونو سافيو فى الفترة القصيرة اللى لعبها مع الأهلى تحت قيادة كولر، خلى إدارة القلعة الحمراء تتجه على طول للبحث عن برازيلى تانى يدعم التشكيل الحالى للفريق…

مفاوضات الأهلى مع ممثلى مارسينيو فشلت بشكل نهائى فى الفترة اللى فاتت، بسبب طموحات اللاعب وطلباته المادية الغير عادية، واللى هتتسبب فى مشكلة فى صفوف الفريق…

إدارة الأهلى اتحركت بسرعة علشان تحسم ملف بديل مارسينيو، وبالفعل كان ملف جديد باسم برازيلى تانى وهو فان جيلهيرمى بيسولى…

بيسولى بيلعب فى صفوف نادى أتلتيكو بارانينسى البرازيلى، وفى الموسم الحالى هو معار لنادى آفاى، ورغم إنه مش الاسم الوحيد المعروض على كولر لكنه أبرز الأسماء المرشحة…

فى تاقرير أكدت إن فى أسماء كتير معروضة على كولر علشان يختار اسم لاعب أجنبى جديد ينضم لصفوف الفريق، فى ظل وجود 4 أجانب مع الأهلى ووجود مكان فاضى…

مفاوضات الأهلى مع بيسولى مش هتكون الأولى، لإن المارد الأحمر خاض جولة مفاوضات مع نادى أتلتيكو بارانينسى لضم بيسولى فى بداية الموسم الحالى…

مفاوضات الأهلى لضم بيسولى قبل كده برضه فشلت بسبب مطالبات مالية مبالغ فيها، وده اللى أكدته تقارير برازيلية فى الوقت ده، لكن المرة دى الأهلى مصر على ضم اللاعب…

لو نجحت إدارة الأهلى فى ضم النجم البرازيلى مش بس هيكون حسم صفقة كويسة، لكنه كمان هيكون خطوة مهمة لحل الخلاف اللى بين كولر ولجنة التخطيط، واللى كان السبب الأساسى فيه أسماء اللاعبين اللى هتمشى فى يناير…

كولر طلب رحيل أكتر من لاعب منهم زياد طارق، ومصطفى سعد ميسى، ولجنة التخطيط رفضت تمامًا وقالت إنهم مهمين للفريق ومحتاجينهم فى الفترة اللى جاية، علشان كده إتمام صفقة بيسولى هتكون خطوة مهمة جدًا لتهدئة الأمور بين جدران القلعة الحمراء.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى