فالنسيا.. هداف المونديال يقرب الأكوادور من دور الـ 16 ويزاحم الهدافيين التاريخيين بأرقامه القياسية
بدأت بطولة كأس العالم 2022 والكل عنده توقعات كتير ومرشحين أكتر سواء للتتويج باللقب والمونديال، أو حتى توقعات ومرشحين للأرقام الفردية فى البطولة…
مع كل التوقعات والأسماء اللى اترشحت أكيد محدش توقع فوز السعودية على الأرجنيتن، زى برضه ما أكيد محدش رشح إينر فالنسيا علشان يكون هداف المونديال من الجولة الأولى…
ديما بطولات كأس العالم بتكون فرصة كبيرة للاعبين كتير علشان يكتبوا أسمائهم فى كتب التاريخ، وساعات نشوف لاعب بمسيرة متواضعة جدًا على مستوى الأندية، لكنه بيلمع وبيكون الأفضل على الإطلاق فى المونديال…
والحقيقة إننا لو فضلنا نقول قد إيه النسخة الحالية من بطولة كأس العالم غير عادية فى كل حاجة، مش هنزهق، لأنها فعلا نسخة غير عادية سواء فى تنظيمها أو أرقامها أو نتايج مبارياتها…
محدش قادر يتوقع لحد دلوقتى ايه اللى بيحصل ومين هيصعد ومين هيخرج، ومين هيوصل للنهاية، ومين هياخد البطولة، ومين أفضل لاعب وأفضل حارس، كل الفرص متاحة لكل الناس…
اللى عمله نجم المنتخب الإكوادورى صاحب الـ33 سنة إينر فالنسيا، بيأكد الكلام ده، بعد ما كتب التاريخ بأهدافه اللى سجلها لحد دلوقتى وبعد لعبه جولتين بس من مجموعات البطولة….
فالنسيا قدريسجل ثنائية منتخب الإكوادور فى شباك المنتخب القطرى فى الجولة الأولى من دور المجموعات علشان فريقه ياخد أو 3 نقط، وبعدها قدر يسجل هدف التعادل فى شباك منتخب هولندا فى الجولة التانية…
فالنسيا مسجل 3 أهداف، واللى مكانش يخطر على بال حد حصل، وأصبح قائد منتخب الإكوادور متصدر قائمة هدافى المونديال على حساب نجوم كتير جدًا، من بينهم ليونيل ميسى، وكريستيانو رونالدو…
فالنسيا بهدفه فى شباك هولندا، حقق عدد كبير من الأرقام، أولهم تعزيزه لصادرته لقائمة هدافى منتخب الإكوادور فى بطولة كأس العالم، غير إنه كمان مسجل آخر 6 أهداف لمنتخب بلاده فى بطولات المونديال…
فالنسيا أول لاعب يسجل 6 أهداف متتالية فى كأس العالم لمنتخب من أمريكا الجنوبية على الإطلاق، يعنى مفيش ولا نجم من نجوم البرازيل، أول التانجو الأرجنتينى قدر يحقق ده، ده غير إنه رابع لاعب فى العالم يحقق الإنجاز ده…
البرتغالى الأسطورى إيزيبيو حقق الإنجاز ده فى 1966، والإيطالى باولو روسى فى مونديال 1982، والروسى أوليج سالينكو فى مونديال 1994، لكن فالنسيا عنده فرصة كبيرة للانفراد برقم جديد وإنه يسجل 7 أهداف متتالية لمنتخب بلاده، فى حال إنه يسجل فى شباك السنغال الماتش الجاى قبل أى حد من زمايله…
عزز إينر فالنسيا، كونه الهداف التاريخى للمنتخب الإكوادورى فى كل البطولات وعلى مر العصو، لكن فى نهاية مباراة هولندا فالنسيا قلق جماهيره بعد خروج بديلا بسبب إصابة اتعرض ليها، لكنه فى الغالب كان تبديل للحفاظ عليه علشان المباراة الحاسمة فى الجولة اللى جاية قدام السنغال…
