الكرة المصرية

سر خناقة ياسر ابراهيم ومشجع الزمالك.. جملة “بن شرقي بيسلم عليك” طورت الأمور

انتشر خلال الساعات الماضية مقطع فيديو لمدافع النادي الأهلي ومنتخب مصر، ياسر إبراهيم وهو بيشتبك مع أحد الأشخاص في شوارع المنصورة اللي تأكد بعد كدا إنه مشجع لنادي الزمالك، اشتباك تطور إنه وصل إلى حد “خناقات” الشوارع بين الطرفين مع ضرب ياسر إبراهيم للشاب بطريقة قوية، ولكن إيه سبب الخناقة دي؟

ياسر إبراهيم ضمن اللعيبة اللي الأهلي إداها أجازة طويلة تصل إلى شهر تقريبًا في ظل رغبته في الاعتماد على البدلاء واللعيبة اللي راجعة من الإصابة في الماتشات المتبقية من الموسم الحالي، عشان كدا اللاعب قرر السفر إلى بلده المنصورة عشان يكون موجود مع أهله بعد فترة ضغط الماتشات الكبيرة الشهور اللي فاتت، وفضل دا بدل من السفر إلى أحد المناطق الساحلية لأنه في حالة نفسية لا تسمح ليه بدا.

يوم الأربع بليل ياسر إبراهيم مع زوجته قرر ينزل يشتري شوية حاجات من أحد المولات الموجودة في المنصورة وتحديدًا سوبر ماركت “مترو”، عشان يتفاجئ بإتنين بيقربوا عليه وبدأ واحد منهم يقوله “أشرف بن شرقي بيسلم عليك” فياسر إبراهيم تجاهل الأمر وكمل في طريقه، لكنه تفاجئ بمطارد الشابين دول ليه وتكرار الولد عبارات إن “أشرف بن شرقي قطعكوا” و”حظك بن شرقي مشي وهتشم نفسك” فياسر كلم الشاب دا وقاله عيب اللي بتقوله دا وكمل في طريقه، ليتفاجئ مدافع الأهلي ومنتخب مصر بوابل من الشتايم من الشاب دا.

الشاب قام بشتيمة ياسر إبراهيم بأفظع الألفاظ الممكنة، وهنا قرر ياسر إبراهيم إنه يودي مراته العربية ويرجع يشتبك مع الشاب دا اللي لما قرب منه زقه وكمل في الشتيمة، ليقوم ياسر إبراهيم بضربه بشكل مبرح وبدأت الناس تسلك بينهم.

بعض الناس اللي كانت موجودة وشهدت على الواقعة طالبت ياسر إبراهيم إنه يقوم بتحرير محضر ضد الشاب دا خصوصًا إنه شغال في محل في الشارع فعلًا، لكنه ياسر إبراهيم رفض عشان ميضيعش مستقبله أو يأذيه وخد عربيته ومراته ومشي من المكان بعد ما الشاب دا هرب بعد ما ياسر إبراهيم ضربه.
الواقعة دي مش جديدة أبدًا على الكرة مش بس المحلية ولكن كمان العالمية بعد ما شوفنا الأسبوع اللي فات دومنيكو بيراردي لاعب منتخب إيطاليا ونادي ساسولو بيدخل في اشتباك برضو مع أحد مشجعين نادي ساسولو.

مشجع ساسولو هاجم بيراردي أثناء توجهه للعربية بتاعته بعد خروج الفريق من كأس إيطاليا، عشان بيراردي يقرر يشتبك معاه وتقوم خناقة شوارع بينهم زي اللي شوفناها بين ياسر إبراهيم والمشجع الزملكاوي، ولكن المرة دي كانت بين لاعب ومشجع من ناديه.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى