الكرة المصرية

3 بدلاء لتعويض رحيل سواريش

أعلن النادي الأهلي المصري الاستغناء عن خدمات ريكاردو سواريش، بالتراضي بين الطرفين والنادي قدامه 3 خيارات عشان يختار بديل سواريش ومديره الفني الجديد الموسم الجاي، من خلالهم يقدر يهرب من أخطاء الماضي القريب واللي كلفته إنه يخسر بطولة الدوري المصري موسمين متتاليين لأول مرة من سنة 2004.

الاختيار الأول اللي قدام الأهلي وهيكون بعيد تمامًا عن إنه ياخد خطوة محفوفة بالمخاطر زي ما عمل في ملف ريكاردو سواريش، وهو إنه يجيب مدرب متمرس مش بس في الكورة الإفريقية كمان في الكورة المصرية، وهو التعاقد مع المدير الفني البرتغالي كارلوس كيروش.

كيروش مدرب قدر يثبت نفسه جدًا مع منتخب مصر وأظهر قدرته على السيطرة على أوضة اللبس واللاعبين بفضل شخصيته القوية جدًا واللي وضحت كمان في علاقته مع اللاعبين، ودا اللي الأهلي محتاجه الفترة دي إنه يجيب مدير فني بشخصية قوية ويقدر يسيطر على الأمور.

كمان كيروش أظهر قدرات فنية كبيرة في إدارة المنتخب وتحديدًا في عملية تطوير اللاعبين وقد إيه تحولت قدراتهم وظهروا بشكل ممتاز معاه في منتخب مصر، وأقربهم دائمًا للذكر هما عمر كمال عبد الواحد ومحمد عبد المنعم، ودا برضو الأهلي محتاجه جدًا الفترة اللي جاية عشان كم اللاعبين الجداد اللي هيضاف على قائمة الفريق.

الاختيار التاني هو مدرب ذاع صيته في إفريقيا وحقق نجاحات كبيرة على مستوى المنتخبات وكمان الأندية وهو خليلوزيتش واللي رحل عن تدريب منتخب المغرب خلال شهر أغسطس الجاري، وبقا متاح لقيادة الأهلي.

خليلوزيتش أثبت كفاءة كبيرة في السيطرة على نجوم كبيرة في منتخب المغرب وحتى في باريس سان جيرمان بفضل شخصيته القوية جدًا اللي بتصل لحد الصدامية في القرارات اللي مبتكونش على هواه.

على المستوى الفني، خليلوزيتش مدرب ممتاز بيقدر يكون منظومة لعب قوية ومتماسكة، والأهم متوازنة بين الدفاع والهجوم ودا اللي الأهلي محتاجه.

العيب اللي بيشترك فيه خيارين خليلوزيتش وكيروش هو إنهم بعاد عن تدريب الأندية بقالهم سنين طويلة وركزوا على تدريب المنتخبات وهو المختلف تمامًا وبيحتاج مجهود مغاير خالص.

الخيار التالت واللي اعتقد صعب الأهلي يلجأ ليه دلوقتي، هو أخذ مخاطرة جديدة والبحث عن مدرب مسبقش إنه كان ليه خبرات في إفريقيا كتجربة جديدة ومحاولة لتكرار تجربة فايلر على سبيل المثال بوجه جديد.

لكن الخيار دا هيكون معرض النادي لتكرار تجربة سواريش ووضع الفريق تحت الضغط الكبير في حال تكرر فشله، ومعتقدش بالوضع الحالي واللي حصل في التجربة الأخيرة إن الأهلي هيروح للخيار المخاطر دا أو يكرر ما حدث في تجربة سواريش.

3 خيارات الأهلي بنسبة كبيرة هيتحرك فيها ومش هيخرج عنها، وإن كان الأقرب الاتجاه للاسمين الأوائل، كيروش وخليلوزيتش.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى