الكرة المصرية

بين الرحيل والصفقات الجديدة .. سوق انتقالات ناري في انتظار المارد الأحمر

لسة أصداء خسارة الدوري المصري الممتاز للموسم التاني على التوالي مستمرة داخل جدران النادي الأهلي، واللي بتعتبر خسارة كارثية للنادي محصلتش من 18 سنة وتحديدًا من موسم 2003/2004.

خسارة الدوري بالتأكيد هتتسبب في تغييرات كتير جدًا في كل ما يخص الفريق الأول، والبداية كانت مع الجهاز الفني بقيادة البرتغالي ريكاردو سواريش واللي يعتبر رأس الفشل في منظومة الأهلي الموسم اللي فات.

إدارة الأهلي بدأ ثورة التصحيح بسرعة جدًا وبعد ساعات من نهاية الدوري المصري بشكل رسمي بعد مباراة سيراميكا كليوباترا، قررت الإدارة وأعلنت رسمي رحيل سواريش وجهازه الفني بالكامل عن النادي، ودلوقتي الأنظار هتتجه كلها عشان تعرف مين الجهاز الفني الجديد والمهم برضو إيه التدعيمات اللي هتحصل في صفوف الفريق لمساعدته على النجاح.

خلونا نبدأ بالكلام عن التدعيمات في قوام الفريق الأساسي واللي بينتظرها الأهلي الموسم الجديد، والأكيد والأهم هو التدعيمات الأجنبية اللي لازم تحصل في الفريق واللي هتفرقه عن باقي الفرق بالكامل.

بقا واضح للكل التأثير الكبير للأجانب في قوة الفرق وإنها بتصنع الفارق بين فريق والتاني خصوصًا في ظل إن كل العناصر المحلية الموجودة دلوقتي في مصر مستواها قريب من بعض جدًا ومبقاش فيه فروقات كبيرة بينهم عشان يصنعوا الفارق بالتالي لازم التركيز بالكامل يكون على تطوير ملف الأجانب في الموسم الجديد.

بدر بانون بالفعل رحل عن الأهلي خلاص، وفي الطريق للخروج بشكل مؤكد لويس ميكيسوني وبيرسي تاو قريب من الرحيل لكنه مش مؤكد زي ميكيسوني، بالتالي فالأهلي قدامه تدعيم بإتنين لعيبة أجانب جداد ممكن يزيدوا لـ3 لعيبة أجانب.

مهم جدًا إن الأهلي يقدر يختار البروفايلات اللي تقدر تفيده خصوصًا في النواحي الهجومية ويكون صفقات مضمونة عشان الصفقات الأجنية دي اللي هتقدر تصنع الفارق مع الأهلي ولينا في علي معلول وديانج عبرة كبيرة.

ولو انتقلنا للأجانب فبقا شبه مؤكد إن شادي حسين ومصطفى سعد “ميسي” على أبواب الانضمام للأهلي من سيراميكا كليوباترا لتدعيم خط الهجوم بداية من الموسم الجديد، ومعاهم كمان جناح إنبي، مصطفى شلبي اللي بقا قريب جدًا من القلعة الحمراء برضو.

في خط الوسط الاسم الأكتر تداولًا وأكبر هو محمد رضا “بوبو” واللي وصل الأهلي لمرحلة متقدمة جدًا في المفاوضات مع فيوتشر عشان يتعاقد معاه الموسم الجديد ويكون بديل السولية اللي بيدور عليه الأهلي بقاله سنين.

على مستوى خط الدفاع، واضح إن الأهلي هيتجح لمعاريه وهيكون التدعيم من خلال استعادة الصاعد محمد المغربي من الدوري التشيكي بعد ما اللاعب قدم مستويات مميزة سواء في الدقائق اللي حصل عليها مع الأهلي أو حتى في أوروبا.

نيجي بقا للراحلين فهنلاقي القائمة تطول، والبداية في خط الدفاع وتحديدًا محمود وحيد واللي انتقل تقريبًا نهائيًا لطلائع الجيش على سبيل الإعارة وكمان مستقبل محمود متولي مبقاش أكيد وهيفضل الأهلي يروح لإعارته بعد إصاباته المتكررة.

في الوسط محمد محمود مش هيكون ليه مكان في الأهلي الموسم الجديد وهيخرج للإعارة عشان ياخد دقايق لعب أكتر، كمان محمد فخري اللي فشل تمامًا في إثبات نفسه وهيكون باب الخروج مفتوح قدامه.

خط الهجوم هو اللي هيكون فيه المذبحة الأكبر بعد تراجع مستوى كل اللعيبة تقريبًا، والأقرب للرحيل هو صلاح محسن وحسام حسن ومعاهم هيكون طاهر محمد طاهر ومحمود عبد المنعم “كهربا” بجانب الإتنين الأجانب لويس ميكيسوني وبيرسي تاو.

سوق انتقالات هيكون مشتعل جدًا للأهلي الموسم الجديد عشان يحصل عملية إحلال وتجديد شاملة في كل مراكز الفريق بعد كارثة خسارة الدوري للموسم التاني على التوالي.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى