الكرة المصرية

زيزو يفتح باب الرحيل عن القلعة البيضاء

زيزو مرضيش أبدًا يخلي جماهير الزمالك تحتفل ببطولة الدوري بهدوء وفرحة كاملة، بعد ما قال تصريحات مقلقة جدًا جدًا جدًا بالنسبة للجماهير البيضاء عن مستقبله مع الفريق في الموسم اللي جاي.

زيزو خرج بعد ماتش التتويج ببطولة الدوري المصري الممتاز ضد الاتحاد السكندري وفي عز احتفال جماهير الزمالك بالبطولة، عشان يرد بشكل مقلق على سؤال أحد المراسلين عن مستقبله مع الزمالك، ليرد: “مش عارف لسة”.

تصريحات زيزو كانت بمثابة الرصاصة في الهوا عشان تهيج كل الشائعات عن مصير اللاعب مع الزمالك الموسم الجاي سواء بالاستمرار أو الرحيل، وتبدأ الاسئلة عن استمراره من عدمه مع الفريق الموسم الجاي.

المؤكد حاليًا إن زيزو عنده عرض قوي جدا جدا من الدوري القطري للتعاقد معاه، عرض هياخد فيه لاعب الزمالك الحالي راتب حوالي 3 أضعاف راتبه الحالي مع القلعة البيضاء ، الراتب المقدم هيوصل لحوالي 3 مليون دولار سنويًا.

بجانب راتب اللاعب الكبير، النادي القطري مقدم عرض كبير للزمالك عشان ياخد أحمد سيد “زيزو” ويتعاقد معاه الصيف الحالي والراتب دا ممكن يوصل لحوالي 3.5 مليون دولار، ودا بيزيد عن الشرط الجزائي بشكل كبير.

زيزو طلب من نادي الزمالك السماح ليه بالرحيل والموافقة على العرض القطري والاستفادة من العرض الكبير اللي متقدم من قطر، وأكد ليهم إن العرض مرضي جدًا ماديًا بالنسبة للاعب وفرصة محتاج يستغلها وبيرغب في دا.

زيزو هدد إدارة الزمالك إنه لو موافقوش على العرض دا هيخلي النادي القطري يدفع قيمة الشرط الجزائي اللي في عقده واللي هي حوالي 36 مليون جنيه مصري “2 مليون دولار” وإنه حابب يفيد الزمالك ماديًا ودا اللي خلاه يطلب من النادي القطري رفع عرضهم عن الشرط الجزائي.

لكن لو الإدارة فضلت متمسكة برأيها هيستخدم الشرط الجزائي مباشرة عشان يمشي، وهو اللي مش عايز يعمله لحد دلوقتي.

الزمالك متخوف جدًا من رحيل زيزو لقطر حاليًا عشان عدم الرجوع للأهلي بعد كدا، ويكون العرض دا مجرد “كوبري” عشان يرجع منه على المنافس وهيمثل دعم كبير للمنافس المباشر، ودا اللي مخليه يرفض العرض.

الساعات اللي جاية هتكون مصيرية في مستقبل زيزو مع الزمالك، هل هيكمل بقميص الفارس الأبيض ولا هنشوفه مع فريق تاني الموسم الجديد؟

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى