الكرة المصرية

أحمد أيمن منصور أولوية تدعيم خط الدفاع في الزمالك.. ما السبب؟؟

رئيس نادي الزمالك، مرتضى منصور أعلن على قناة ناديه في الساعات الأولى من اليوم، الجمعة عن إتمام التعاقد مع المدافع الدولي أحمد أيمن منصور في صفقة انتقال حر بعد ما عقده مع نادي بيراميدز يخلص بنهاية الموسم الحالي (2021/2022).

أحمد أيمن منصور هيكون تالت صفقات الزمالك الصيف الحالي بعد ما أتم الفارس الأبيض تعاقده مع صفقتين أجنبيتين وهما، زكريا الوردي وإبراهيما نداي في صفقات انتقال حر برضو، عشان يكون مدافع بيراميدز الحالي هو تالت صفقة في ميركاتو الزمالك، بشكل مجاني.

السؤال هنا، ليه الزمالك اختار أحمد أيمن منصور مع وجود أسماء ممكن تكون أقوى منه على المستوى الدفاعي وغيابه كمان عن المشاركة على مدار موسمين بشكل متتالي، ودا اللي ممكن يخليه يفقد مستواه ويتراجع، فليه تم اختياره؟

الواضح من تحركات الزمالك الحالية في فترة الانتقالات إن جوسفالدو فيريرا المدير الفني هيتجه للاستمرار على طريقة لعب 3/4/3 اللي أنهى بيها الموسم الحالي واعتقد عليها في النص التاني من الموسم وساهمت بشكل كبير في تحسن أداء الفريق، وهيتخلى عن طريقته المفضلة سابقًا 4/3/3.

أحمد أيمن منصور هيكون حل مثالي لتطبيق الطريقة دي في الزمالك بسبب قدرته إنه يلعب كمدافع أيسر وكمان كظهير أيسر وهنا فيريرا بالتأكيد هيستخدمه كمدافع في الثلاثي الخلفي ناحية الشمال عشان يستفيد من قدراته في المكان دا.

لعب أحمد أيمن منصور في مركز الظهير الأيسر أكتر من مرة خلاه يكون مميز في الخروج بالكورة كمان بيقدر يغطي المساحات بشكل كويس، ودا هيخليه مناسب جدًا لطريقة اللعب دي وأفضل من أسماء تانية يمكن قوية دفاعيًا لكنها بتلعب في نظام لعب (2 مدافعين) بس واللي بيكون ليها تحركات وتغطية مختلفة.

قدرة أحمد أيمن منصور برضو على اللعب في مركز الظهير الأيسر ممكن تخلي فيريرا يعتمد عليه أحيانًا كظهير أيسر لو احتاج واحد دفاعيًا أقوى من أحمد فتوح في المركز دا، خصوصًا مع كبر سن محمد عبد الشافي وعدم قدرته إنه يشارك باستمرار والتراجع الكبير في مستوى عبد الله جمعة مع الفريق.

بالتالي أحمد أيمن منصور هيكون مدافع مثالي في اللعب بـ3 مدافعين عشان يتحط هو ناحية الشمال، واستخدامه كجوكر كمان كظهير أيسر لو احتاج الأمر عشان كدا الزمالك اتجه للتعاقد معاه خصوصًا وإنه صفقة مجانية وهتقدم إضافة في مركزين من المراكز اللي الزمالك محتاجها.

والمؤكد بالنظر للميركاتو اللي الزمالك ماشي فيه لحد دلوقتي إنه تحت إشراف فيريرا واختياراته للعيبة حتى لو ملهاش سيط كبير عند الجماهير أو أسماء رنانة لكنها هتخدم أفكاره ويقدر يوظفها بطريقة تساعده في تنفيذ أسلوب لعبه.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى