الكرة المصرية

مدة غياب طارق حامد عن المنتخب بعد عودته لقائمة الفراعنة

روي فيتوريا أعلن باقي قايمة منتخب مصر واللي هتخوض فترة التوقف الدولي اللي جاية بداية من يوم 17، بعد ما أسدل الستار عن المحترفين اللي هينضموا للمنتخب بعد ما كان أعلن عن المحليين من أسبوع تقريبًا.

المدير الفني البرتغالي أعلن عن قايمة مكونة من 8 أسماء محترفين للانضمام إلى منتخب مصر في أول معسكر وتجمع للفراعنة تحت قيادة روي فيتوريا بعد ما تولى القيادة الفنية للفراعنة.
قائمة المحترفين المنضمين لمنتخب مصر تكونت من محمد صلاح، ومحمود حسن تريزيجيه، وأحمد حجازي، طارق حامد، عمر مرموش، مصطفى محمد، أحمد حسن كوكا، سام مرسي.

ولعل الاسم الأبرز إن نسلط عليه الضوء عشان غيابه في الفترات اللي فات عن قايمة المنتخب هو ارتكاز الزمالك السابق واتحاد جدة الحالي، طارق حامد واللي بيظهر مرة تانية في قايمة الفراعنة.

طارق حامد ظهر مع كارلوس كيروش في قائمة منتخب مصر في أول ماتشين وبعد كدا غاب عن باقي فترة المدير الفني البرتغالي المخضرم، عشان يشارك كبديل في ماتشين ليبيا في شهر أكتوبر من عام 2021.

آخر مباراة ظهر فيها طارق حامد يوم 11 أكتوبر من عام 2021 في مواجهة ليبيا في الجولة الرابعة من التصفيات المؤهلة إلى المرحلة النهائية من تصفيات كاس العالم، وبعد كدا غاب عن كل تجمعات منتخب مصر.

ولما نيجي نحسبها هنلاقي إن طارق حامد بكدا غاب عن قايمة منتخب مصر لمدة تصل إلى حوالي 329 يومًا، يعني داخلين على سنة كاملة، والأسباب مختلفة فالبعض بيأكد إن كان فيه مشاكل كبيرة بينه هو وكيروش وهو دخل في صدام معاه، والبعض الآخر بيقول إن السبب فني بحت.

كيروش بعد ما اعتمد على طارق حامد كبديل ماتشين، قرر إنه يستبعده في الماتشين الباقيين في التصفيات ضد أنجولا والجابون، وبعد كدا تم استبعاده تمامًا من البطولة العربية، وبعدها كمان استبعاده من قايمة كأس أمم إفريقيا، وأخيرًا من قايمة ماتشين السنغال في تصفيات كاس العالم.

طارق حامد شارك في الـ180 دقيقة كاملة مع الاتحاد في أول جولتين من الدوري السعودي ضد العدالة والاتفاق، عشان يقرر روي فيتوريا يضمه للقايمة، خصوصًا إن المدير الفني البرتغالي عدى قبل كدا على الدوري السعودي وعارف قوته وتنافسيته الكبيرة.

قد يكون غياب معظم لعيبة الأهلي بسبب الراحة اللي خدوها في آخر جولات الدوري، واستبعاد لعيبة الزمالك عشان كاس لوسيل ساهمت في إنه ينضم للقايمة رغم غيابه لفترات طويلة، لكن الكورة دلوقتي في ملعب طارق حامد، يا إما يقدر يقنع فيتوريا بيه أو يرجع تاني بعيد عن المنتخب.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى