الكرة المصرية

صراع ثلاثي قمة الدوري المصرى لضم مصطفي فتحي

اشتعل صراع ثلاثي بين الأهلي والزمالك وبيراميدز عشان التعاقد مع الجناح الدولي المصري مصطفى فتحي، واللي بقا فيه مشكلة كبيرة في رجوعه لفريقه، التعاون السعودي رغم بداية الموسم في السعودية بسبب أزمة التجنيد اللي بيعاني منها بعد رجوعه لمصر في الأيام اللي فاتت.

مصطفى فتحي مش قادر يرجع للسعودية بسبب أزمة التجنيد ودا خلى الأندية المصرية الكبرى بتتصارع على ضمه وتستغل الفرصة دي، فإيه بقا اللي بيقدمه الجناح المصري الدولي عشان تتصارع كل الأندية
دي على ضمه؟

مصطفى فتحي جناح أيمن بيلعب برجله الشمال، ميزته الكبيرة هو قدرته على مراوغة الخصم في مساحات ضيقة جدًا بسبب سرعة حركته بالكورة ومهارته الفردية العالية واللي بتخليه يتفوق دايمًا في كل المواقف الفردية على الخصم.

كمان مصطفى فتحي بيتميز بسرعته الكبير بالكورة ومن غيرها ودا بيخليه بيتفوق على أي خصم في سباقات السرعة ويكون ليه الأفضلية دايمًا، كمان مع دا فمصطفى فتحي فعال جدًا سواء على مستوى التهديفي أو حتى صناعة الفرص مش بس مهارة بلا هدف أو فايدة كبيرة.

مصطفى فتحي لعب في مسيرته الاحترافية في الدوري المحلي سواء الزمالك أو سموحة، شارك في 209 ماتش على مدار المواسم اللي فاتت، سجل فيهم حوالي 55 هدف وصنع 29 هدف ودا يدل قد إيه هو فعال على مرمى الخصوم وفي صناعة الفرصة مش بس مهارة بدون فايدة.

كمان لما احترف مصطفى فتحي للدوري السعودي مع التعاون في المرتين، لعب 26 ماتش، قدر يسجل 10 أهداف وصنع 6 أهداف أخرى، معدل مساهمة في الأهداف ممتاز جدًا للجناح المصري ويوضح قد إيه هو ممتاز ومفيد للفريق.

العيب الوحيد في مصطفى فتحي هو عدم التزامه بالأدوار الدفاعية بشكل كبير بسبب إنه مش مميز بالقوة البدنية العالية، ودا اللي بيخلي الظهير اللي وراه مطلوب منه أدوار دفاعية أكتر وأكتر عشان يغطي عليه، كمان ضعف قدراته البدنية والجسمانية بتأثر عليه في الماتشات البدنية العنيفة خصوصًا إفريقيًا.

لكن الأكيد إن النادي اللي هيقدر
يحصل على خدمات مصطفى فتحي هيكون كسب صفقة ممتاز وأضيف لييه سلاح هجومي فردي وجماعي فتاك، ومعدل تهديفي كبير بيضمنه وفي ظل ندرة المواهب المصرية دلوقتي فمصطفى فتحي فرصة من دهب لكل كبار الكرة المصرية، فيا ترى وجهة مصطفى فتحي هتكون فين في النهاية؟

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى