الكرة المصرية

رحالة الجزائر قريب من الأهلي

لسة الأهلي بيبحث عن التدعيمات القوية اللي ترضي طموحات وغرور الجماهير، وتحط الفريق على الطريق الصحيح عشان يرجع للمنافسات المحلية والأفريقية من تاني بعد ما خسر لقب الدوري للمرة التانية على التوالي لأول مرة من 18 سنة.

ومن أهم الملفات اللي بيركز عليها النادي الأهلي في تدعيماته هو المحترفين، واللي بقا واضح للكل قد إيه هم اللي بيقدروا يصنعوا الفارق في ظل إن كل اللاعبين في مصر تقريبًا بقوا شبه بعض ومفيش لعيبة تقدر تقول عليهم فلتات، باستثناء أحمد سيد “زيزو” مثلا هو اللي فارق عن باقي اللاعبين.

الأهلي فعلًا فضا مكانين للأجانب بعد ما مشي بدر بانون إلى قطر القطري وبعد كدا خرج لويس ميكيسوني للإعارة إلى نادي أبها السعودي، وفيه محاولات لسة لرحيل بيرسي تاو في الفترة الحالية، بالتالي الأهلي هيكون عنده فرصة إضافة عنصرين أجانب على الأقل أو تلاتة على الأكتر.

الاسم اللي بدأ يظهر امبارح في الصورة هو الجزائري سفيان فيجولي، واللي متاح في سوق الانتقالات حاليًا بشكل مجاني بعد نهاية عقده مع نادي جالاتاسراي التركي، ونهاية فترة الانتقالات في معظم دول أوروبا ودا بيخليه أقرب إنه يرجع لأحد الدوريات العربية، واللي برضو جزء كبير منها قفل باب القيد.

تعالو بقا نشوف مسيرة سفيان فيجولي..
سفيان فيجولي جناح بيجيد في الناحيتين الشمال واليمين، إلا إن مركزه الأساسي جناح شمال عشان بيلعب برجله اليمين، مواليد 1989 (32 سنة)، وخاض مسيرته بالكامل في الملاعب الأوروبية ومكنش ليه أي تجارب مع الفريق الأول في أي دولة عربية.

فيجولي بدأ مسيرته مع نادي جرينوبل الفرنسي وبعد كدا كان بداية توهجه لما انتقل إلى فالنسيا الإسباني في سنة 2010، لكنه خرج إعارة لمدة موسم مع ألميريا قبل ما يرجع تاني للخفافيش ويستمر معاهم 5 سنين.

فيجولي خلال 5 مواسم مع فالنسيا لعب حوالي 202 مباراة، قدر خلالهم يسجل 31 جول ويصنع 40 هدف آخر عشان يظهر بشكل كويس جدًا يدفع بعد كدا وست هام يتعاقد معاه في سنة 2017 ويبدأ رحلته في الدوري الإنجليزي لكنها مكنتش موفقة بالشكل الكافي.

الجناح الجزائري لعب مع وست هام موسم واحد بس، شارك فيه في حوالي 27 ماتش، قدر خلالهم يسجل 4 أهداف ويصنع 3 تانيين لكنه مقدرش يحجز مكان أساسي مع الفريق عشان يرحل سريعًا وكانت وجهته المرة دي للدوري التركي مع النادي الأكبر، جالاتا سراي.

فيجولي قضى مع جالاتا سراي 5 مواسم من 2017 حتى نهاية الموسم اللي فات، لعب في المواسم دي 162 مباراة، سجل فيهم 32 هدف وصنع 34 هدف وكان من نجوم الفريق خلال الفترة دي قبل التخلي عنه بسبب الأزمة المالية.

فيجولي حصد جائزة أفضل لاعب جزائري في سنة 2012 وأفضل لاعب في الدوري التركي سنة 2019، كمان كان من نجوم محاربي الصحراء اللي قدروا ياخدوا بطولة كأس أمم إفريقيا في 2019.

مسيرة حافلة ولاعب يمتاز بالشراسة الهجومية والمهارة الكبيرة جدًا وهيكون إضافة لأي فريق يروح ليه، لكنه حل قريب المدى لأنه في آخر مواسمه داخل المستطيل الأخضر فتقدر تستفيد منه 3 سنين وخلاص، فهل الأهلي هيقدر ينتهز الفرصة دي ويتعاقد معاه؟

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى