الكرة المصرية

سامسون أكينيولا .. كل ما تريد معرفته عن صفقة الزمالك الجديدة

سامسون أكينيولا .. دبابة الزمالك الجديدة

الزمالك مستمر في تدعيماته خلال الانتقالات الصيفية الحالية عشان يدعم فريقه والهدف الأكبر الموسم الجديد هو الحفاظ على بطولة الدوري المصري للموسم التالت علىى التوالي لأول مرة في تاريخ القلعة البيضاء وكمان تحقيق دوري أبطال إفريقيا المستعصي على الزمالك من 2002.

الزمالك لحد دلوقتي تعاقد مع صفقتين خلال الانتقالات الحالية والإتنين أجانب وهما، المغربي زكريا الوردي وإبراهيما نداي ولسة قدامه مكان أجنبي فاضي في قايمته وبالتالي لسة بيدور على صفقة أجنبية جديدة عشان يتعاقد معاها ويكمل تدعيم الفريق.

وبحسب الأخبار اللي انتشرت في الساعات اللي فاتت على لسان رئيس نادي الزمالك، مرتضى منصور فالفريق في طريقه للتعاقد مع المهاجم البنيني سامسون أكينيولا واللي بيلعب في الدوري الفنزويلي الفترة الحالية، وبيشغل مركز رأس حربة الصريح، مين بقا أكينيولا دا؟

المهاجم البنيني سامسون أكينيولا

سامسون أكينيولا لاعب من مواليد مارس سنة 2000، عنده 22 سنة، بالتالي فكرة قيده تحت السن دا هيكون لمدة شهور بس وبعد كدا هيتحول للقايمة الأساسية لأنه هيكسر حاجز الـ23 سنة.

أكينيولا انضم لنادي كاراكاس الفنزويلي يوم 18 يناير سنة 2021، يعني من سنة واحدة بس لعب فيهم مع الفريق الكبير وفريق الشباب ولعب عدد ماتشات كبير وصل لـ67 ماتش على مدار سنة ونص تقريبًا.

أكينيولا خلال الـ67 ماتش اللي لعبه مع كاراكاس الفنزويلي قدر فيهم يسجل 28 جول وصنع 11 جول، يعني ساهم بحوالي 39 جول بمعدل حوالي مساهمة كل ماتشين ودي نسبة كويسة جدًا.

أكتر ميزة عند صاحب الـ22 سنة، هو قدرته على المواجهات الفردية وإنه بيقدر يعدي من موقف 1 على 1 بشكل ممتاز جدًا، كمان لعيب سريع وبيقدر يستغل المساحات بسبب سرعته وتحركاته في ضهر الدفاع ودا ممكن يستغلها الزمالك في الهجمات المرتدة واللي بيتميز بيها الفريق تحت قيادة جوسفالدو فيريرا واللي بيحاول يوجد مساحات عشان يلعب على التحولات السريعة جدًا.

كمان أكينيولا بيحاول كتير جدًا على المرمى سواء من داخل المنطقة أو من خارجها، عنده مشكلة في دقة المحاولات دي لكنه بيتميز بالشجاعة وبالتالي يقدر فيريرا يطور جزئية الإنهاء على الجول دي.

عيوب المهاجم أكينيولا

المشكلة الأكبر للمهاجم البنيني هو قصر قامته واللي بيوصل لحوالي متر و69 سم، ودا بالنسبة للمهاجمين قصير جدًا ودا بيخليه مش مميز خالص في ضربات الراس ومن أبرز سلبياته إنه متقدرش تعتمد عليه خالص في الكرات العرضية وضربات الراس واللي بتعتبر من أسلوب لعب الزمالك اللي بيعتمد عليه بشكل مستمر تحت قيادة فيريرا بالتالي هيكون حلقة ضعيفة جدًا في دا.

ملخص كل دا إن أكينيولا لعيب واعد تقدر تطوره لكن يقدر الزمالك يتفيد بيه في مركز تاني غير المهاجم خصوصًا مع اعتماده على الكرات العرضية، ولكن وجوده كمهاجم هيكون استغلاله بس على الأرض والمساحات في ضهر الدفاع، ولكنه لسة لعيب صغير يقدر يتطور مع فيريرا.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى