حكايات المونديالقطر 2022

رحلة كفاح كامافينجا من مخيمات اللاجئين لريال مدريد وقيادة وسط فرنسا

الأسطورة المعروفة بتقول إنه من رحلم المعاناة يولد الأمل، وفى عالم كرة القدم نقدر نقول إن مفيش حاجة بتتحقق على أرض الواقع قد المقولة دى، وياما سمعنا قصص لاعبين بداية حياتهم كانت توحى بالضياع قبلما يتحولوا لنجوم وأساطير…

قصص ومآسي كتير مر بيها نجوم عالميين فى كرة القدم، لكن ديما الأفارقة هما ملوك القصص دى وأكتر ناس مرت بظروف صعبة جدًا فى بداية حياتهم من الهجرة واللجوء وحتى مواجهة الموت…

اتعودنا ديما إن إفريقيا مكان ميلاد عدد غير عادى من المواهب، وديما هى المصدر الأول للمواهب المميزة سواء لأوروبا أو آسيا، وأحيانا حتى بتصدر المواهب دى لمنتخبات بلاده أخرى…

الهجرة واللجوء كان حاجة معتادة جدًا بالنسبة للآفارقة لحد فترة قريبة، وإن كان حتى مازال أمر موجود لحد دلوقتى، لكنه فى فترات سابقة كان موجود بشكل غير عادى، خصوصًا مع الحملات الاستعمارية والحروب الأهلية اللى شهدتها إفريقيا على مر تاريخها…

بنشوف منتخبات أوروبية كتير جدًا مليانة لاعبين أفارقة فى أصولهم، والتجنيس وموهبتهم أدوهم فرصة إنهم يمثلوا منتخبات أوروبية كتيرة، ومش بس كده، ده ساعات يوصلوا لأهم وأغلى الألقاب فى التاريخ…

المنتخب الفرنسى يعتبر أكتر منتخب بيستفيد من المهاجرين من القارة الإفريقية، سواء من أصحاب الأصول الجزائرية، أو الوافدين من قلب إفريقيا، وحتى فى الجيل الحالى نقدر نعد أكتر من اسم زى كريم بنزيما، وبول بوجبا، ونجولو كانتي، وكمان إدواردو كامافينجا…

بطل حكايتنا النهاردة هو كونغولى الأصل فرنسى الجنسية إدواردو كامافينجا، واللى بيقود خط وسط المنتخب الفرنسى فى بطولة كأس العالم 2022، مع زميله فى ريال مدريد تشوامينى…

من 20 سنة وتحديدا فى نوفمبر 2002، اتولد إدوارد كامافينجا فى مخيمات اللاجئين القادمين من الكونغو إلى أنجولا، وعاش ظروف صعبة جدًا فى طفولته، بعد ما هرب أبوه وأمه من الحرب المشتعلة فى العاصمة الكونغولية كينشاسا…

بعد سنتين بس من ولادة كامافينجا كان القدر مخبيله خطوة مهمة جدًا فى حياته، وهى انتقال أهله للحياة فى فرنسا، وفى سن صغيرة جدًا بدأ كامافينجا يمارس الرياضة لكنها مش كرة القدم، لأنه بدأ مسيرته الرياضة بالجودو…

وقتها كان بيلعب كرة القدم كهواية مش أكتر، خصوصا إن حياتهم فى فرنسا كانت مستقرة لحد كبير، لحد ما فى 2013 بيتهم اتعرض لحريق وخسروا أغلب ممتلكاتهم، وكامافينجا قال إن الحادثة دى كانت سبب رئيسي إنه يقرر ياخد كرة القدم كمهنة…

بدأ إدواردو كرة القدم فى نادى فوجير فى سن 7 سنين، وقتها ما رضيش يقابل المدرب وصمم يعرفه على نفسه وهو بيلعب، وفى سن 11 سنة انضم لنادى رين وبعد 5 سنين بس وقع أول عقد احترافى ليه وبقى فى الفريق الأول، وأصبح أصغر لاعب يلعب فى الفريق الأول لرين فى تاريخه…

السنة اللى فاتت انضم كامافينجا لصفوف ريال مدريد الإسبانى فى عمر 19 سنة بس، وبقى واحد من العناصر الأساسية فى وسط ملعب الملكى، وأصبح البديل المثالى للعملاق الكرواتى لوكا مودريتش اللى خلاص على وشك إنهاء رحلته مع الفريق الكبير ده…

فى أول موسم ليه مع الريال توج كامافينجا بدورى أبطال أوروبا والدورى الإسبانى، والسوبر الإسبانى، والسوبر الأوروبى، ورغم كله ده إلا إنه ما حصلش على الجنسية الفرنسية إلا فى 2019 بس علشان ينضم لمنتخب فرنسا تحت 21 عاما وبقى أصغر لاعب يلعب للديوك فى سن 17 سنة…

وبعد 20 سنة من رحلته المؤلمة وولادته فى مخيمات اللاجئين فى أنجولا، النهاردة كامافينجا يعتبر قائد خط النص فى قايمة منتخب فرنسا فى مونديال 2022 فى ظل غياب الكبيرين بوجبا، وكانتى…

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى