غريم رمضان صبحي في بيراميدز خلاص هيروح الأهلي.. ده الكلام اللي جماهير القلعة الحمراء بتردده في الوقت الحالي مع الاقتراب من حسم صفقة اللاعب إبراهيم عادل.
الأهلي اللي خاض مفاوضات طويلة قبل كده عشان ياخد اللاعبين وسط إصرار من بيراميدز على عدم بيع اللاعب اللي شايفين أنه مستقبل النادي.. لكن ليه هيببعوه دلوقتي؟ وإيه حكاية غضب اللاعب من إدارة بيراميدز؟ وإمتى الصفقة هتخلص؟.. أسرار كتيرة نكشفها في السطور التالية.
على مدار شهور طويلة والأهلي بيحاول طول الوقت أنه يحسم صفقة إبراهيم عادل لاعب بيراميدز الناشئ الصغير واللي يعتبر من أهم المواهب في الكرة المصرية، خاصة أنه يعتبر غريم رمضان صبحي في النادي وبيلعب في نفسه مركزه تقريبا، لدرجة أن مدرب بيراميدز بيحاول يوظفه في أماكن أخرى في وسط الملعب بدل ما يلعب جناح شمال عشان يقدر يجمع بينه وبين رمضان صبحي.
الأهلي اللي بيعاني في الحتة دي من وقت ما رمضان صبحي مشي من النادي الأهلي، وأي حد جاه في المركز ده مقدرش أنه يعوض رمضان.. عشان كده مجلس إدارة القلعة الحمراء شايف أن إبراهيم عادل هو البديل الأنسب لرمضان في الجناح الشمال، مش بس كده وكمان لاعب صغير في السن وقدامه مستقبل كبير في النادي.. والأهم أن اللاعب حلمه يلعب في الأهلي.
عشان كده الأهلي قدم عروض كبيرة عشان يتعاقد مع اللاعب، لكن إدارة بيراميدز كانت بترفض وتصر على أن إبراهيم عادل يكمل معاهم، لغاية لما ظهرت أخبار عن اقترابه من الأهلي بعد تراجعه بيراميدز عن فكرة عدم التخلي عن اللاعب.
إيه اللي حصل؟
مصدر مطلع بنادى بيراميدز قالت إن الإدارة تراجعت فى الوقت الحالى، وقررت فتح المزاد على بيع اللاعب سواء فى الانتقالات الشتوية بيناير المقبل، أو الانتظار لنهاية الموسم، وكمان الإدارة معندهاش مانع لبيع اللاعب لصاحب العرض الأعلى سعرًا حتى لو كان الأهلي، وأنه فى حالة وصول عروض رسمية هيتم دراستها بجدية والبت فيها لحسم مصير اللاعب في المرحلة الجاية.
المواقع الصحفية كشفت عن أن اللاعب دخل في نوبة غضب بعد ما وصلته الأخبار أن إدارة بيراميدز تراجعت عن الأصرار في عدم التخلي عليه دلوقتي، في حين أنهم ضيعوا عليه فرصة الانضمام للنادي الاهلي وده اللي خلاه يتواصل مع أحد الوسطاء عشان يشوف مدى إمكانية تقديم عرض تاني من القلعة الحمراء للانضمام إليها.
الوسيط أكد لإبراهيم عادل أن الأهلي بالفعل مهتم بيه ومعندوش مانع أنه يقدم له عرض تاني، لكن في الوقت الحالي في ملفات كتيرة مشغول فيها مجلس الإدارة واللي كانت متوقفة الفترة اللي فاتت بسبب أن الخطيب كان في رحلة علاج بالخارج.
كمان الوسيط أكد للاعب أن الأهلي هيقدم عرض وأنهم سعداء بفكرة رغبته على الانضمام إلى النادي عشان كده فرصه للانضمام للقلعة الحمراء كبيرة ولو مكنتش في موسم الانتقالات الشتوية هتكون في نهاية الموسم.
