مجموعات مزدحمة ومضطرين للانتظار لليوم الأخير.. لقطات المونديال في الجولتين الأولي والثانية
بتستمر منافسات النسخة الاستثنائية رقم 22 من منافسات بطولة كأس العالم، واللى بتقام فى قطر ولأول مرة على أرض عربية…
الجولة الأولى من دور المجموعات من كأس العالم، كان مليان بأرقام وأحداث غريبة واستثنائية، والجولة التانية من المجموعات ما فرقتش كتير عن الجولة الأولى…
الدور التانى من مجموعات المونديال بدأ بفوز غير متوقع لمنتخب إيران على منتخب ويلز، علشان يرجع منتخب إيران فرصه فى الاستمرار فى كأس العالم…
مباراة إيران وويلز كانت شاهدة على أول حالة طرد فى النسخة دى من كأس العالم، بعد طرد ويان هينيسى حارس مرمى منتخب ويلز بسبب تدخل عنيف فى الدقايق الأخيرة من عمر المباراة…
المباراة التانية على طول فى الجولة دى من مجموعات كأس العالم، حقق فيها منتخب قطر تانى رقم سلبى تاريخى ليه فى النسخة دى، بعد ما بقى أسرع منتخب مستضيف يودع البطولة من الجولة التانية على طول…
منتخب قطر كان حقق رقم سلبى تاريخى فى الجولة الأولى من المجموعات بعد ما أصبح أول مستضيف يخسر المباراة الافتتاحية فى تاريخ البطولة…
منتخب الإكوادور بيواصل مفاجآته وبيجبر منتخب هولندا على التعادل فى مباراة الفريقين بعد ما الكل توقع إن هولندا هتكسب بسهولة وتضمن الصعود، لكن الحصان الأسود للبطولة لحد دلوقتى بيثبت إنه منتخب قوى ومش هيكون سهل إطلاقا…
منتخب إنجلترا ما طلعش مخيف ولا حاجة، بعد الانتصار الخارق قدام إيران بـ6 أهداف فى الجولة الأولى، لإنه اكتفى بالتعادل السلبى قدام المنتخب الأمريكى المنظم اللى حرمه من فرصة الصعود المبكر…
المنتخب التونسى صحيح فرصه فى الصعود لسه موجودة على الورق، لكنه صعب الأمور على نفسه بعد الخسارة قدام أستراليا فى الجولة دى…
المنتخب التونسى دلوقتى بقى محتاج يكسب فى الماتش الأخير قدام منتخب فرنسا، ومش أى مكسب، ده محتاج يكسب بنتيجة كبيرة علشان يضمن فرق الأهداف يكون لصالحه، يعنى على الورق ممكن يصعد، لكن فى الواقع نقدر نقول مستحيل…
المنتخب السعودى بيخسر فى الماتش التانى قدام بولندا رغم الأداء المميز اللى بيواصل تقديمه، لكن فرصه لسه موجودة ومحتاج بس يكسب ماتش المكسيك علشان يصعد…
المنتخب الفرنسى كان أول الصاعدين لثمن نهائى المونديال بعد ما حقق الفوز قدام منتخب الدنمارك علشان ينهى تمامًا أسطورة إن حامل اللقب لازم فى النسخة اللى بعد تتويجه يقدم مستوى سىء ويودع البطولة…
ليونيل ميسى أخيرًا حضر المونديال، وبيسجل ثنائية فى شباك المكسيك بحافظ بيها على حظوظ الأرجنتين فى الصعود للدور اللى جاى، وبيفضلهم مباراة مش صعبة أوى يعنى قدام بولندا…
ومن الأرجنتين لواحدة تانية من مفاجآت المونديال، منتخب كوستاريكا بيحقق الفوز على اليابان بهدف نظيف، العجيب فى الموضوع إن الجول جه من التسديدة الوحيدة للمنتخب الكوستاريكى فى البطولة كلها…
المنتخب المغربى أبهر العالم بفوز مستحق جدًا قدام منتخب بلجيكا بهدفين دون رد، علشان يقرب جدًا من الصعود للدور التانى ويبقى محتاج الفوز قدام منتخب كندا علشان يكمل رحلته فى المونديال…
مباراة المغرب حصل فيها موقف غريب جدًا، حارس المرمى ياسين بونو بدأ الماتش بشكل طبيعى، لكن بعد السلام الوطنى على طول وقبل صفارة البداية وقع فى الأرض وخرج من الملعب بسبب إصابة غريبة جدًا…
المنتخب الكرواتى بيفكرنا إنه وصيف المونديال اللى فات وبيفوز بأربع أهداف قدام كندا، رغم إن المنتخب الكندى قدم مباراة كبيرة وحاول محاولات كتير لكن فى النهاية الانتصار كان لخبرة كرواتيا الكبيرة…
منتخب إسبانيا بيكتفى بالتعادل قدام المنتخب الألمانى، اللى بيقدم نسخة ما تتخيرش عن النسخة اللى فاتت اللى خرج فيها من دور المجموعات، وبيطلع بأسوأ صورة ممكنة…
منتخب الكاميرون النهاردة اتعادل مع صربيا ب3 أهداف لكل فريق، وبيواصل الأسود دفع تمن تعيين ريجوبير سونج مدير فنى للفريق من غير أى خبرات تأهله للمكان ده…
الكاميرون بدأ الماتش من غير أندريه أونانا حارس المرمى، واكتشفنا إنه ساب معسكر الكاميرون خالص بسبب خلاف مع سونج اللى عايزه يتحول لحارس مرمى تقليدى بالطراز القديم ويفضل واقف تحت التلت خشبات وما يلعبش كورة حديثة، وده اللى رفضه أونانا فلقى نفسه برة قايمة ماتش صربيا، فقرر ياخد شنطته ويمشى…
منتخب كوريا الجنوبية الحقيقة قدم ماتش كبير قوى قدام منتخب غانا، لكن الفوز فى الآخر كان من نصيب البلاك ستارز بعد ماتش ممتع وغير عادى…
محمد قدوس لاعب منتخب غانا شارك فى إنجاز تاريخى بعد ما سجل هدفين من 3 للبلاك ستارز، علشان يساهم فى تسجيل غانا 3 أهداف فى ماتش واحد لأول مرة فى تاريخ مشاركتهم فى المونديال…
أما المنتخب البرازيلى فهو تانى منتخب يضمن الصعود لثمن نهائى المونديال بعد فرنسا، بعد ما حقق الفوز بهدف نظيف قدام سويسرا، اللى الحقيقة قدمت مباراة كبيرة جدًا…
وأخيرا المنتخب البرتغالى اللى بينضم لقايمة المتأهلين لثمن نهائى كأس العالم رسميا، بعد انتصار مستحق قدام منتخب أوروجواى القوى جدا، فى ماتش انتهى بنتيجة 2-0، رغم الأداء الرائع للمنتخب الأمريكى الجنوبى…
الماتش ده كان برضه فيه لقطة غريبة جدًا، وهى الجدل اللى أثير عن اللى جاب الجول الأول للبرتغال، الأول الهدف اتحسب لرونالدو، قبل ما فيفا يعلن بشكل رسمى إن رونالدو ما لمسش الكورة واتحسبت لبرونو فيرنانديز.
