نجم الأهلي واحتياطي تونس.. رحلة النسور القصيرة في المونديال وفوز تاريخي علي فرنسا بمشاركته
أول ما تقول على معلول قدام أى مشجع أهلاوى، هتلاقيه على طول ابتهج وقالك ده اللى عليه العين والظهير الأيسر اللى ما جاش زيه فى تاريخ المارد الأحمر…
لكن الحقيقة إن النعيم اللى فيه معلول، وكل البطولات اللى رفعها مع الأهلى، مكانتش شفيعة ليه علشان تحل وتنهى لعنته مع منتخب بلاده…
على معلول بدأ مسيرته مع شباب نادى الصفاقسى التونسى فى سنة 2009 بشكل احترافى، وبعد تألق غير عادى وموهبة كبيرة ظهر بيها سواء مع لعبه فى مناطق الهجوم أو حتى على مستوى الدفاع، كان صفقة مثالية للنادى الأهلى…
الأهلى وبعد جيلبيرتو، وسيد معوض، كان بيدور على ظهير أيسر يعوض النجوم دول، ويكون القطعة اللى تكمل منظومة الفريق اللى ديما بيدور على البطولات والإنجازات، وأخيرًا لقى ضالته سنة 2016 فى على معلول…
معلول لعب فى مسيرته مع الناديين اللى لعب ليهم الأهلى والصفاقسى 400 ماتش لحد دلوقتى، سجل 75 هدف، وصنع 104، واتطرد مرة واحدة بس فى مسيرته كلها…
ولو على البطولات فخد عندك، 4 دورى مصرى، و2 كأس مصر، و3 سوبر مصرى، و2 دورى أبطال إفريقيا، و2 سوبر إفريقى، ده غير لقب الكونفدرالية، ولقب الدورى التونسى مع الصفاقسى…
كل الإنجازات دى والإبداع ده والبريق الغير عادى فى مسيرة معلول مع الأندية، بيقابله سوء حظ غريب جدًا مع المنتخب التونسى، ومسيرة متخبطة جدًا…
معلول لعب مع المنتخب التونسى 82 مباراة، سجل فيهم هدفين، وصنع 10، ورغم إنه بيكون ديما مؤثر فى مواقف كتير مع منتخب تونس، لكنه بيغيب على طول عن المناسبات الكبيرة…
فى كأس العرب الأخيرة كان موجود مع بعثة تونس لكنه كان مصاب علشان كده كان بديل، ومع المدرب السابق منذر الكبير غاب عن المشاركة إلا إذا كان المنتخب التونسى محتاج يزود الفعالية الهجومية، لكن فى التشكيل الأساسى مش موجود…
ومع بداية كأس الامم الإفريقية شارك فى الماتش الأول قدام مالى، لكن طبعا الماتش المثير للجدل ده انتهى بخسارة تونس بهدف نظيف، فى الماتش اللى كان حكمه أنهاه قبل نهاية الوقت الأصلى بربع ساعة تقريبا…
بعد كده شارك معلول فى فوز تونس على موريتانيا 4-0، لكن حظه الغريب واللعنة اللى بتطارده خلته يتعرض للإصابة بفيروس كورونا ويغيب عن الماتشات اللى جاية…
فى ماتش بوركينا فاسو فى ربع النهائى شارك معلول لكن كبديل، لكن المنتخب التونسى للأسف خسر المباراة وودع البطولة….
معلول كان ليه دور كبير فى فوز تونس فى المرحلة الأخيرة من التصفيات المؤهلة لكأس العالم 2022، وساهم فى فوز تونس قدام مالى فى الذهاب، والتعادل فى الإياب وصعد مع نسور قرطاج للمونديال…
وفضل معلول فى التشكيل الأساسى لتونس فى ماتش ودى انتهى فوز تونس قدام جزر القمر، لكن جلال القادرى المدير الفنى الجديد واضح إنه مكانش مقتنع بيه، لإنه فى آخر ودية دفع بمرتضى بن وناس لاعب قاسم باشا بداله قدام البرازيل…
مع بداية المونديال اتأكدنا إن القادري مش مقتنع بمعلول، وفعلا ماشاركش مع تونس فى التعادل قدام الدنمارك، أو الهزيمة قدام أستراليا، لكنه كالعادة بيشارك فى الوقت الحاسم وفى ماتش فرنسا اللى هو الفرصة الأخيرة للنسور فى المونديال…
وكالعادة بيظهر معلول بشكل قوى جدًا فى المباراة الأخيرة وبيشارك فى فوز تاريخى للمنتخب التونسى على فرنسا، لكن للأسف نسور قرطاج بيودعوا البطولة بعد فوز أستراليا على الدنمارك والتأهل رفقة فرنسا، لكن معلول ورفاقه خرجوا من الباب الكبير.
