أصعب لحظة بيمر بيها لاعب هى الاعتزال، سواء كان اعتزاله على المستوى الدولى أو اعتزاله كرة القدم بشكل نهائى، وخصوصا لما يكون لاعب عنده موهبة كبيرة…
وهبى الخزرى نجم المنتخب التونسى، قرر إن رحلة نسور قرطاج فى مونديال 2022 هى الأخيرة ليه مع الفريق على المستوى الدولى، علشان تكون مباراة فرنسا هى الظهور الأخير ليه بقميص منتخب بلده…
دخل المنتخب التونسى بطولة كأس العالم 2022 وهو مش مرشح لأى حاجة فى البطولة دى، خصوصا انه كان بيلعب فى مجموعة قوية واللى بتضم الدنمارك وأستراليا وبطل النسخة الأخيرة منتخب فرنسا…
منتخب تونس بدأ رحلته بتعادل قدام الدنمارك فى ماتش قوى جدا كان المفروض يكون منتهى بفوز نسور قرطاج، لولا كام فرصة ضيعهم عصام الجبالى مهاجم الفريق…
الماتش التانى خسر المنتخب التونسى قدام أستراليا وصعبوا مهمته فى المونديال، خصوصا ان الماتش الأخير كان قدام فرنسا بكل النجوم الموجودة فى الفريق…
منتخب تونس عمل المستحيل وكسب فرنسا، لكن للأسف سيناريو الماتش التانى كان ضده وأستراليا كسبت الدنمارك، علشان يودع نسور قرطاج البطولة…
وهبى الخزرى كان واحد من أهم لاعبى المنتخب التونسى، مش بس فى النسخة دى من المونديال، لكنه كان لاعب أساسى فى صفوف الفريق من وقت ظهوره الأول…
الخزرى لعب للمنتخب الفرنسى تحت 21 سنة، قبل ما يقرر فى 2013 يغير جنسيته ويلعب للمنتخب التونسى، ولعب أول ماتش ليه قدام منتخ إثيوبيا فى يناير 2013 ضمن الاستعداد لنهائيات أمم إفريقيا…
الخزرى اللى بيلعب حاليا فى صفوف مونبلييه لعب 74 ماتش دولى بقميص منتخب تونس فى مختلف البطولات، سجل خلالهم 25 هدف وصنع 14، وبقى تانى واحد فى قايمة الهدافين التاريخيين لنسور قرطاج بعد عصام جمعة صاحب الـ37 هدف…
إنجازات الخزرى الفردية بتتكلم عن نفسها، لأنه بيعتبر أكتر لاعب تونسى شارك فى الأهداف فى بطولات كأس العالم ورصيد مساهماته وصل لـ5 أهداف….
فى ترتيب أكتر التونسيين مشاركة فى الأهداف فى أمم إفريقيا، بيجى الخزرى فى المركز التانى بـ8 أهداف، وقبله يوسف المساكنى اللى ساهم فى 11 هدف بين الصناعة والتسجيل…
ويمكن يكون الإنجاز الأكبر والأهم فى مسيرة وهبى الخزرى الدولية مع منتخب تونس، إنه بقى هداف العرب التاريخى فى المونديال برصيد 3 أهداف، علشان يعادل الرقم المسجل باسم النجم السعودى السابق سامى الجابر، ومعاهم كمان سالم الدوسرى نجم المنتخب السعودى الحالى…
فى آخر جولة من دور المجموعات، كان النجم الأول هو وهبى الخزرى فى الماتش اللى جمع المنتخب الفرنسى ونظيره التونسى، بعد ما سجل هدف الماتش الوحيد واللى ضمن الفوز لمنتخب نسور قرطاج، وتوج كمان بجايزة أفضل لاعب فى المباراة….
الخزرى شاف إن ده أنسب وقت يقلع فيه شارة قيادة منتخب تونس، ويقرر يعتزل اللعب الدولى، خصوصًا وإنه هيكون صعب يشارك فى المونديال مرة تانية، وقرر يخرج من الباب الكبير جدا.
