أخبار المونديالقطر 2022

أليكسيس ماك أليستر الايرلندي الذي قاد الأرجنتين لثمن النهائي وأنقذ ميسي

مسألة التجنيس فعلا حاجة غريبة جدا، فكرة إنك تكون من بلد معين وأصولك كلها لبلد معين، لكن تكون بتلعب بقميص بلد تانى وتحت علم بلد تانى حاجة فعلا غريبة جدا…

الحقيقة إن النسخة الحالية من المونديال فيها عدد كبير من المجنسين، وعادة ده بيكون فى المنتخبات الضعيفة أو نقدر نقول عليها دول ملهاش فى الكورة أوى، لكن إن ده يحصل فى بلد من عواصم كرة القدم فى العالم زى الأرجنتين ى تبقى حاجة غريبة فعلا…

المنتخب الأرجنتينى بدأ النسخة دى من المونديال بخسارة تاريخية قدام المنتخب السعودى، وبشكل مش متوقع إطلاقا، بعد ما كان التانجو مرشح أول للتتويج باللقب…

فكرة إن دى آخر نسخة مونديال هنشوف فيها ليونيل ميسى، خلت الكل يتأكد إن دوافع الأرجنتين هتخليهم مختلفين خالص عن أى نسخة تانية، ده غير القايمة القوية جدًا اللى بيملكها الفريق…

فى الماتش التانى ظهر برضه المنتخب الأرجنتينى بشكل متواضع لحد ما قدام المكسيك، والأسطورة ميسى هو اللى فض الاشتباك وحافظ على حظوظ التانجو بعد ما سجل هدفين قدام المكسيك…

فى الماتش التالت قدام بولندا ومع ضرورة الفوز علشان يضمن الأرجنتين الصعود لثمن نهائى المونديال، الكل كان متوقع إن ميسى اللى هيخلص الموضوع برضه، لكن اللى حصل غير كده…

ميسى ضيع ضربة جزاء فى الشوط الأول اتصدى ليها الحارس البولندى تشيزنى، وواضح إن النجم الأرجنتينى الأول مكانش فى قمة تركيزه خلال الماتش ده…

لكن البطل الأول فى الماتش كان أليكسيس ماك أليستر واللى سجل هدف فك بيه الحصون الدفاعية لمنتخب بولندا علشان يمهد الطريق للأرجنتين للتأهل لدور الـ16…

لحد هنا مفيش مشكلة، لكن لما تعرف إن ماك أليستر أصلا مش أرجنتينى، تبقى دى حاجة غريبة فعلا، ليه منتخب بالقوة دى ومن بلد كلها لاعيبة كورة يحتاج للاعب من أصول تانية….

ماك أليستر مولود فى لا بامبا من أصل أيرلندى وأسكتلندى، يعنى ملوش علاقة بالأرجنتين من قريب ولا من بعيد، وليه أخين بيلعبو بشكل احترافى فى عالم كرة القدم برضه…

الحاجة اللى ربطته بالأرجنتين هى إن والده من سانتا روزا فى الأرجنتين ومولود هناك ومتربى هناك رغم أصله الأيرلندى، ده غير كمان إن والده كان لاعب كرة فى الأرجنتين رغم إنه مكانش مشهور أوى…

مسيرته بدأت مع ديبورتيفو باركى، وبعده سان لورينزو وفى الاتنين كان مع أخوه كيفين، بعد كده لعبو مع بعض فى بوكا جونيورز، وشارك فى أولمبياد طوكيو الأخيرة وكان ضمن الفريق اللى فاز على مصر 1-0 فى دور المجموعات…

غاب عن قايمة الأرجنتين لمدة سنتين ونص، قبل ما يرجع تانى فى المونديال ده، ولحد دلوقتى شارك فى 84 دقيقة، وسجل هدف، ورغم ضعفه فى التحامات الهواء، إلا إنه مميز جدا فى قطع الكرات الأرضية…

أليستر كان ليه قصة كوميدية مع الأرجنتين فى المونديال ده، وهو إنه كان مشهور فى بلدهم باسم كوكو، اللى هو الزنجبيل فى الأرجنتين، لكنه كان بيكره الاسم ده…

ماك أليستر طلب من ليونيل ميسى بما إنه قائد المنتخب، إن محدش يقوله كوكو، وميسى نفذ طلبه، علشان بعد كده يكافئ ميسى وينقذ آخر مونديال ليه، ويسجل هدف مهم جدا قدام بولندا كان بداية رحلة الصعود لثمن النهائى.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى