كرة القدم مش مجرد لعبة قايمة على الأرقام والإحصائيات والأسماء اللي بيملكها الفريق، لكن المكسب والخسارة ديمًا بيتدخل فيهم عوامل كتير من برة أرض الملعب…
الكل مستني نهائي قوي لنسخة استثنائية من كأس العالم بين الأرجنتين وفرنسا، ورغم إن فرنسا بتملك فريق على الورق أقوى، لكنهم مهددين بخسارة عدد كبير من نجومهم في نهائي المونديال، والسبب .. حمة غامض…
العالم كله مستني يشوف كمان ساعات مين هيتوج بالنسخة 22 من بطولة كأس العالم واللي نقدر نقول عليها استثنائية بكل ما تحمل الكلمة من معنى، خصوصًا إنها بين اتنين من أكبر منتخبات العالم الأرجنتين وفرنسا…
منتخب الأرجنتين طريقه كان سهل شوية، رغم التعثر شوية في دور المجموعات، لكنه في ثمن النهائي عدى بسهولة من أستراليا، وقدر يخلص من عقبة منتخب هولندا، أما كرواتيا فخدمته وبعدته عن البرازيل، قبل ما يعاقبهم ويخرجهم من البطولة في نص النهائي….
المنتخب الفرنسي الناحية التانية كان مشواره بالعكس تمامًا، لعب دور مجموعات سهل نسبيًا، قبل ما يخبط في بولندا في ثمن النهائي، وبعدها يلعب نهائي مبكر قدام إنجلترا ويعدي بصعوبة…
آخر الاختبارات الصعبة لمنتخب فرنسا، كان ماتش المغرب في نص نهائي كأس العالم، ورغم الأداء الرائع لأسود الأطلسي، كان منتخب فرنسا صاحب الغلبة والتفوق، ولقى لنفسه مكان في نهائي كأس العالم…
رغم ان كل اللي فاضل على رفع كأس العالم خطوة واحدة، لكن حاجة جديدة حصلت هددت تفوق المنتخب الفرنسي اللي موجود على الورق، وخلته مهدد بإنه يخسر عدد من نجومه المهمين جدًا قدام الأرجنتين…
منتخب فرنسا أعلن رسميًا إصابة 3 لاعبين بحمة غامض اسمه “حمة الأبل”، التلاتة هما أوباميكانو اللي غاب عن ماتش المغرب، وكينجيسلي كومان، وأدريان رابيو، والأسماء دي منهم اتنين كانوا أساسين مع فرنسا من بداية البطولة هما أوباميكانو ورابيو…
اللاعيبة دي اتعزلت في مكان بعيد عن معسكر المنتخب الفرنسي علشان ما تنقلش العدوى لباقي اللاعبين، خصوصًا إن الحمة ده يعتبر من عائلة حمة كورونا…
حمة الإبل بيصيب الجهاز التنفسي، وبيسبب حالة إعياء للمصاب بيه، يعني باختصار شديد، أي لاعب هيصاب بالحمة ده هيكون صعب جدًا إن مكانش مستحيل يشارك بأي طريقة…
رغم إن مفيش تأكيد رسمي، لكن تقارير كتير أكدت إن في عدد كبير من لاعيبة فرنسا أصيبوا بالحمة مش مجرد 3 لاعبين، وإن أسماء كبيرة ضمن المصابين بالحمة ده في وقت قاتل قبل ساعات من نهائي كأس العالم…
إصابة لاعبي فرنسا بالحمة ده ممكن جدًا تكون ضربة قوية جدًا، وتكون خطوة مهمة في ترجيح كفة الأرجنتين في نهائي المونديال، وزي ما قولنا صحيح مفيش تأكيد رسمي لسه، لكن زي ما بيقولوا يا خبر النهاردة بفلوس…
