الكرة المصرية

عروض أوروبية وخليجية لضم زيزو

يبدو أننا على أعتاب توديع واحد من نجوم الكرة المصرية خلال آخر موسمين وأفضل لاعب بلا منازع في الموسم المُنقضي من الدوري المصري، أحمد سيد “زيزو” واللي بقا مسألة رحيله عن الزمالك مسألة وقت ليس إلا في الانتقالات الحالية.

زيزو قاد الزمالك للفوز بالدوري المصري للموسم التاني على التوالي في إنجاز غاب عن القلعة البيضاء من 2003/2004، ولما بنقول إنه هو اللي قاد الزمالك فدا مش مبالغة أبدًا لأنه هو هداف البطولة وأكتر لعيب صنع أهداف في الدوري، ودا اللي خلى رابطة الأندية تختاره أفضل لاعب في الدوري المصري، بدون تفكير كتير ولا تردد.

رغم تأثير زيزو الضخم جدًا في مسيرة الزمالك، لكن واضح إن مهمة الحفاظ عليه للموسم الجديد بقت صعبة جدًا في الوقت الحالي بعد العروض الجنونية اللي تلقاها النادي واللاعب في نفس الوقت واللي بتخليه أقرب من الرحيل من أي وقت مضى.

الزمالك تلقى دلوقتي عرضين من أجل بيع زيزو، واحد أوروبي وتحديدًا من الدوري الفرنسي من نادي نانت، والتاني خليجي وتحديدًا من الريان القطري، فإيه الموقف دلوقتي؟
خلونا نبدأ من عند العرض الأوروبي، نانت تواصل بالفعل مع والد زيزو واللاعب نفسه وقدموا ليه عقد لمدة 5 مواسم هياخد فيهم اللاعب حوالي 2 مليون يورو سنويًا، وهو اللي رحب بيه زيزو جدًا لكنه وضع شرط هو اللي عطل الصفقة لحد دلوقتي.

نانت الفرنسي عرض على زيزو إنه يستخدم الشرط الجزائي في عقده مع الزمالك واللي بتبلغ قيمته 2 مليون دولار وميدخلش في مفاوضات مع إدارة النادي الأبيض من الأساس ويستغل الشرط الجزائي، لكن زيزو رفض دا تمامًا وأكد لمسؤولين نانت إنه مش هيمشي غير بموافقة نادي الزمالك ودا اللي عطل المفاوضات.

لكن العرض الأقوى دلوقتي والأكثر واقعية هو اللي وصل من نادي الريان القطري، واللي فتح مفاوضات فعلًا مع نادي الزمالك رسميًا عشان يتعاقد مع زيزو مقابل 5 مليون دولار واللي هو يزيد عن ضعف الشرط الجزائي في عقد اللاعب مع القلعة البيضاء.

الريان القطري قدم عرض بقيمة 5 مليون دولار حفاظًا على علاقته بالزمالك وإنه مش عايز يدفع الشرط الجزائي وبس ولكنه قدم أكتر من ضعف الشرط الجزائي، وهو بالنسبة لمسؤولين الزمالك عرض مرضي جدًا.

زيزو كمان هياخد مرتب هيوصل لحوالي 3 مليون دولار سنويًا وهو يعتبر أكتر من ضعف اللي بياخده في الزمالك، وبالنسباله العرض دا مغري جدًا.

والد زيزو بيضغط في الوقت الحالي على إدارة الزمالك عشان تسمح لزيزو إنه يمشي خصوصًا إنه عرض مادي مش هيعوض خالص بالأرقام دي وفرصة لكل الأطراف إنها تستفيد.
في الآخر، هل تفتكر زيزو هيكمل مع الزمالك ولا هيرحل؟

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى