الكرة العالمية

تعرف علي دي فرانشيسكو المرشح كمدير فني للنادي الاهلي ؟

لسة الأهلي مستمر في رحلة البحث عن مدير فني جديد عشان يقود الفريق بداية من الموسم الجديد خلفًا للبرتغالي ريكاردو سواريش، واللي تم توجيه الشكر لييه بعد نهاية الموسم اللي فات بعد ما خسر بطولة الدوري المصري للمرة التانية على التوالي.

خسارة الأهلي للدوري المصري للمرة التانية على التوالي هي حدث جلل لأنها بتحصل لأول مرة من سنة 2004، عشان كدا كل جماهير الأهلي قاعدة مترقبة ومستنية تشوف المدير الفني الجديد اللي هيقود السفينة الحمراء بداية من الموسم الجديد وهتكون عليه آمال وفي نفس الوقت ضغوطات كبيرة عشان تعويض السقوط المدوي في الموسمين الأخيرين.

الاسم الجديد اللي تم طرحه وتداوله في الساعات اللي فاتت كان الإيطالي أوزيبيو دي فرانشيسكو، واللي ضمن القايمة النهائية اللي الأهلي بيتفاوض معاها عشان يكون منهم المدير الفني الجديد.

دي فرانشيسكو هو مدرب إيطالي وُلد في عام 1969، يعني لديه من العمر 52 سنة وهو في عرف المدربين مش كبير، وكانت كل تجاربه تقريبًا في الدوري الإيطالي ومسبقش ليه الخروج من إيطاليا في مسيرته التدريبية.

أشهر حاجة في مسيرة المدير الفني الإيطالي دي فرانشيسكو كانت قيادته لنادي روما لتحقيق ريمونتادا تاريخية على حساب نادي برشلونة في سنة 2018، واللي مشهورة عند جماهير كرة القدم بريمونتادا “مانولاس” ولكنه لييه مسيرة تدريبية محترمة في رحلته بالدوري الإيطالي.

دي فرانشيسكو بدأ مسيرته التدريبية في سنة 2010 لما تولي تدريب نادي بيسكارا في أول محطة تدريبية لييه، وقدم فعلًا مستويات مميزة بعد ما خاض مع الفريق 61 ماتش، قدر فيهم يفوز في 23 ماتش ويتعادل في 17 مباراة وخسر 21 مباراة، والأرقام دي مقارنة بنادي بيسكارا كانت جيدة جدًا.

بعد كدا انتقل المدير الفني الإيطالي لنادي ليتشي، ولكن تجربته دي مكنتش كويسة خالص بعد ما خاض الفريق في 14 مباراة، قدر فيهم يكسب ماتشين ويتعادل ماتشين ويخسر 10 ماتشات عشان تتم إقالته بعد كدا، بعد كدا عاد للصورة من بوابة ساسولو واللي كانت الأنجح ليه بداية من عام 2012.

دي فرانشيسكو مع ساسولو قعد 5 سنين من وقت تأهلهم في 2012 لحد 2017، لعب فيهم 209 ماتش في مختلف البطولات، قدر فيهم يحقق المكسب في 83 ماتش وتعادل في 54 ماتش وخسر في 72 ماتش، ودا بالنسبة لنادي صاعد حديثًا أرقام ممتازة خليته من أفضل المدربين الصاعدين في إيطاليا، عشان يروح بعدها لروما.

المدرب الإيطالي الطموح بعد وصوله لروما خاض الفريق في 87 ماتش، قدر فيهم يكسب 46 ماتش واتعادل في 18 وخسر 23 ماتش، وقدر يحقق المركز التاني في الموسمين اللي قاد فيهم روما، وزي ما قولنا كانت اللقطة الأبرز في مسيرته ريمونتادا على برشلونة.

بعد روما، دي فرانشيكو خاض تجربتين بس مع كالياري وهيلاس فيرونا لكنهم مكانوش ناجحين خالص عشان كدا مشي بشكل سريع، ومتولاش تدريب أي فريق بعد كدا في النص التاني من الموسم اللي فات أو بداية الموسم دا.

تجربة هتكون مثيرة لمدرب قدم كورة قدم جميلة مع ساسولو وروما لكنه محققش أي بطولات، دا مش معناه إنه متعرضش للضغوطات لأن تدريب روما بالتأكيد بيمثل ضغط كبير، لكن الأزمة والعقبة الأكبر اللي هتواجهه إنه مخرجش من أوروبا وتحديدًا إيطاليا في أي تجربة تدريبية، وهنا هتكون المغامرة.

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى