أسد الكاميرون صاحب هدف سويسرا فى شباك الأسود الكاميرونية .. ما لاتعرفه عن بريل إمبولو الذي رفض الاحتفال
إنك تشوف لاعب من بلد معين بيلعب فى بطولة كبيرة زى كأس العالم بقميص بلد تانى خالص شىء وارد جدا فى عالم كرة القدم، لكن إنه يسجل ويتسبب فى خسارة بلده الأم، ده شىء مش بنشوفه كل يوم…
بطل قصة النهاردة كان ممكن يكون واحد من أسود الكاميرون، لكنه خان عشيرته واتسبب فى خسارتهم الأولى فى كأس العالم 2022 بقميص منتخب سويسرا…
منتخب الكاميرون وصل لنهائيات كأس العالم 2022 بشكل مثير للجدل، بعد المباراة الجدلية اللى لعبها قدام منتخب الجزائر فى المرحلة الأخيرة من التصفيات المؤهلة للبطولة…
مباراة الكاميرون قدام الجزائر كانت محل شك كبير بعد كلام كتير عن تلقى الجامبى بكارى جاساما حكم المباراة رشوة علشان المباراة تنهتى لصالح منتخب الأسود وياخدوا بطاقة التأهل للمونديال…
أداء المنتخب الكاميرونى فى بطولة كأس الأمم الإفريقية الأخيرة مكانش الأداء الكبير اللى يقول إنهم هيعملوا حاجة فى كأس العالم، لدرجة إنهم كسبوا جزر القمر بهدف واحد بس مع إن جزر القمر كانت بتلعب المباراة من غير حارس مرمى وكان مدافع من الفريق هو الحارس فى المباراة دى بسبب إصابة كل الحراس…
المنتخب الكاميرونى فى ربع نهائى أمم إفريقيا صعد على حساب بوركينا فاسو بركلات الترجيح، قبل ما يخسر فى نص النهائى قدام منتخب مصر بنفس الطريقة، وكل الأداء المتواضع ده اكتمل بصعود مشكوك فيه للمونديال…
قبل بطولة كأس العالم 2022 صامويل إيتو رئيس الاتحاد الكاميرونى لكرة القدم، قال إنه متوقع إن منتخب بلاده هيوصل المباراة النهائية قدام المغرب وهيتوج بالبطولة…
كلام إيتو طبعا ردود الأفعال عليه كلها كانت عبارة عن سخرية، لكنه أكد فى أكتر من مناسبة إنهم مستعدين للبطولة وناوين عملوا مفاجأة، والحقيقة إن الشك دخل قلوبنا بعد المفاجآت اللى شوفنها لحد دلوقتى…
المنتخب السويسرى دخل مباراة الكاميرون وضمن كتيبته لاعب اسمه بريل إمبولو، واللى هو أصلا كاميرونى، وراح مع أهله سويسرا وهو عنده 4 سنين…
بدأ كرة القدم وهو عنده 13 سنة فى بازل السويسرى، وبدأ مع منتخب سويسرا فى مختلف المراحل العمرية…
رغم مشاركته مع منتخبات سويسرا إلا إنه مكانش معاه الجنسية علشان يشارك مع المنتخب الأول، وحاول منتخب الكاميرون يضمه فى سن 17 سنة، وتحديدا فى كأس العالم 2014…
إمبولو لعب كمان لبروسيا مونشنجلادباخ، وشالكه فى ألمانيا، وأكد إنه أجل قراره هيمثل أى منتخب أطول وقت ممكن لكنه فى الآخر قرر يمثل منتخب سويسرا، وأكد إنه ما بينكرش أصوله الكاميرونية وعاوز أولاده يحتفظو بالأصول دى ويرد الجميل لبلاده الأصلية بالأعمال الخيرية، لكنه فى النهاية حاسس إنه مواطن سويسرى…
فى مباراة الكاميرون وسويسرا فى بداية المنتخبين فى مونديال 2022، إمبولو لعب مع السويسريين وسجل هدف الفوز فى المباراة، لكنه فى نفس الوقت ورغم خيانته للأسود إلا إنه احتراما لأصوله رفض الاحتفال بالهدف مع إنه فى أهم بطولة فى العالم…
إمبولو حاليا بيلعب لنادى موناكو الفرنسى، وجايب 8 أهداف فى 23 مباراة، رغم إنه عانى فى بداية مسيرته من تغيير مركز كتير لحد ما استقر أخيرًا على مركز المهاجم.
