المنتخب المغربى بيستعد لماتش مهم قدام منتخب فرنسا فى كأس العالم، بعد ما نجح أسود الأطلسى فى تحقيق إنجاز للتاريخ بالوصول للمربع الذهبى للنسخة 22 من البطولة…
الكل عنده طموح إن المغرب تقدر تكون موجودة فى الماتش النهائي رغم صعوبة مواجهة فرنسا، لكن في حاجة جديدة حصلت نقدر نقول إنها بشرة خير للمغاربة…
المنتخب المغربي قدر يكون أول منتخب عربي يوصل ربع نهائي كأس العالم، قبل ما يكون أول منتخب عربي وإفريقي يوصل نص نهائي أغلى بطولة في العالم…
المغاربة دخلوا البطولة بطموحات كبيرة جدًا، وحاربوا من أول دقيقة علشان يحققوا الإنجاز ده، وبالفعل كل اللي قدموه كان بيثبت إن طموحهم مش بس الأداء المشرف…
وليد الركراكي مدرب المنتخب المغربي، واللى بقى أول مدرب عربي وإفريقي يوصل لنص نهائي كأس العالم، قال قبل ماتش البرتغال الأخير، إن المغرب طموحه يكمل في البطولة وعينه على اللقب…
تقارير كشفت إن الركراكي أثناء اتفاقه مع الاتحاد المغربي لكرة القدم علشان يقود المنتخب، كان المفروض يوقع عقد لحد 2026، لكنه رفض وقال إن عقده يكون لحد 2024 بس، وإنه لو فشل في الوصول لنص نهائي كأس العالم هيمشي…
ثقة الركراكي كانت في محلها، والمنتخب المغربي وصل لنص النهائي، وعنده صدام كبير مع المنتخب الفرنسي، ولو قدر يعدي منه مش هيكون لقب كأس العالم بعيد عنه…
الاتحاد الدولي لكرة القدم أعلن اسم الحكم المكلف بإدارة ماتش المغرب ضد فرنسا في نص نهائي كأس العالم، وهو المكسيكي سيزار أرتورو راموس واللي نقدر نقول عليه وشه حلو على العرب…
راموس حكم ماتش تاني للمنتخب المغربي في النسخة دي من المونديال، واللي كانت قدام بلجيكا في الجولة التانية من مجموعات البطولة، وانتهت بفوز المغاربة 2-0…
الحكم المكسيكي كمان أدار ماتش المنتخب التونسي قدام الدنمارك في بداية مشوار نسور قرطاج في دور المجموعات واللي انتهى بتعادل سلبى…
المونديال ده هو التاني لسيزار أرتورو راموس، بعد ما حكم 3 ماتشات في نسخة روسيا 2018، كمان حكم نهائي كأس العالم للأندية 2017 بين ريال مدريد الإسباني وجريميو البرازيلي…
راموس حكم ماتشات كتير للعرب سواء على مستوى الأندية أو المنتخبات، وشارك في كأس آسيا في 2019، وأدار 4 ماتشات لمنتخبات عربية كلها انتهت بالفوز ما عدا ماتش واحد خسره المنتخب السوري قدام أستراليا…
ويمكن أبزر الماتشات اللي أدارها راموس في البطولة دي كان ماتش الإمارات وقطر، واللى خلص بفوز قطر 4-0، وفي كأس العالم للأندية 2021، حكم ماتشين للهلال السعودى، الأول قدام الجزيرة الإماراتي وانتهى 6-1 للهلال، والتاني قدام تشيلسي وخسره الهلال 1-0 رغم إنه قدم أداء قوي جدًا…
في النهاية كل الأمور بتقول إن المنتخب المغربي يقدر يكمل مشواره للآخر، وكلنا أمل وطموح إن المونديال الأول على أرض عربية، هيكون بطله واحد من المنتخبات العربية
