الكرة المصرية

الأحمر خارج كأس العالم لأول مرة منذ 18 سنة.. فراعنة اليد تستعد للمونديال ومفاجأة في القائمة

صحيح إن كرة القدم هي اللعبة الشعبية الأولى في مصر، لكن بالأداء والإنجازات والأرقام، نجوم منتخب مصر لكرة اليد خلوها تنافس كرة القدم وبشدة…

المنتخب الوطني بيشارك في كأس العالم 2023، وداخل البطولة وهو واحد من الكبار واسمه ضمن المنتخبات اللي بتعتبر من ملوك اللعبة بمعنى الكلمة…

بتنطلق منافسات بطولة العالم لكرة اليد واللي هتتلعب خلال الفترة من 11 ولحد 29 يناير الحالي بتنظيم مشترك بين دولتين هما بولندا والسويد…

النسخة دي هي النسخة رقم 28 من بطولة كأس العالم لكرة اليد، وهتتلعب على 9 صالات وبيشارك فيها 32 منتخب من 5 قارات مختلفة ومن بينهم المنتخب المصري…

منتخب مصر لكرة اليد قدر يحول اللعب من مجرد لعبة ضمن ألعاب كتير ما بيتابعهاش الجمهور، للعبة شعبية بتنافس كرة القدم في أهميتها ونسب مشاهدتها ومتابعتها…

المشاركة دي هي رقم 17 لفراعنة اليد في كأس العالم، والمشاركة الأولى لمصر كانت سنة 1964 وقتها اكتفينا بالمركز الـ14، أما أكتر مركز كويس حققه الفراعنة كان المركز السادس في نسختين 95، و97…

المركز الرابع هو أفضل مراكز فراعنة اليد في بطولة كأس العالم، وده كان في نسخة 2001 في فرنسا، والحقيقة إن من سنة 2000 مصر شهدت تطور كبير جدًا في  كرة اليد…

المنتخب المصري لحد الوقت ده كان معاه لقبين بس في إفريقيا، وطبعًا كان أفضل مركز ليه في المونديال المركز السادس، لكن في سنة 2000 حقق لقب أفريقيا للمرة التالتة ومن وقتها قدر يزود ألقابه لحد 8 ألقاب في القارة السمراء علشان يكون الأكثر تتويجًا بالبطولة في القرن الـ21 برصيد 6 ألقاب…

بشكل عام مصر عندها 8 ألقاب أمم إفريقيا على مستوى المنتخب الأول، و7 ألقاب دورة الألعاب الإفريقية، ده غير 13 لقب قاري على مستوى فريق الشباب، و6 ألقاب في دورة الألعاب العربية، ده غير ذهبية الألعاب الأولمبية الصيفية للشباب في 2010، ويمكن أفضل إنجاز لحد دلوقتي هو تتويج منتخب الناشئين بكأس العالم في 2019…

مصر في 1999 كانت أول بلد عربي تستضيف كأس العالم لكرة اليد، وفي 2021 كان أداء المنتخب الوطني في مختلف البطولات، خلى اللعبة في حد ذاتها ليها شعبية كبيرة جدًا، وكل الناس كانت بتتابعها بشغف كبير، مصر كمان استضافت 6 نسخ من بطولة أمم إفريقيا وقدرت تفوز في 4 منها…

المنتخب الوطني هيلعب أول مبارياته في النسخة دي من كأس العالم يوم 13 يناير، قدام منتخب كرواتيا، ضمن مجموعة بتضم مع الفراعنة وكرواتيا، المغرب، وأمريكا…

لكن للأسف بيغيب عن البطولة دي واحد من أهم اللعيبة في تاريخ كرة اليد المصرية، أحمد الأحمر، اللي الكل بيعتبره أسطورة حية مش بس في تاريخ مصر، ده في تاريخ كرة اليد بشكل عام…

أحمد الأحمر بيملك في تاريخ مع المنتخب الوطني 5 ألقاب في أمم إفريقيا، و3 ألقاب لدورة الألعاب الإفريقية، ولقبين لدورة الألعاب العربية…

الأحمر كمان هو الهداف التاريخي للمنتخب الوطني في كأس العالم برصيد 277 هدف، والهداف التاريخي للفراعنة في الأولمبياد برصيد 105 هدف، وكمان الهداف التاريخي لمصر في أمم إفريقيا برصيد 283 هدف، وده أول مونديال للفراعنة من غير الأحمر من 2005….

وجات قايمة منتخب مصر النهائية لكرة اليد كالتالي: محمد علي – كريم هنداوي – عبد الرحمن حميد – عمر الوكيل بكار – احمد مؤمن – علي زين – احمد هشام السيد – حسن قداح – يحيي الدرع – سيف الدرع – احمد خيرى – شادى خليل – محسن رمضان – مهاب سعيد – محمد سند – اكرم يسري – محمد ممدوح – ابراهيم المصري – احمد عادل.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى