أخبار المونديالقطر 2022

منافس هالاند الجديد.. أرقام تاريخية ويستعد لخلافة رونالدو.. حكاية كودي جاكبو

بطولات كأس العالم ديما بتكون شهادة ميلاد لنجوم أغلبنا ما بيكونش عارف هما مين أصلا، وفجأة نلاقى لاعب شاب ظهر وتألق بشكل غير عادى وقدم أداء ملهوش مثيل…

نجوم شباب بيحطمو أرقام قياسية، ويحققوا إنجازات تاريخية رغم إنهم بيكونو بيظهرو فى المونديال لأول مرة، وآخرهم النجم الهولندى كودى جاكبو…

بدأت منافسات النسخة الحالية من بطولة كأس العالم، وشوفنا فيها حاجات كتير استثنائية وغير عادية، من أرقام تاريخية، لأحداث غريبة، للاعبين بيلمع اسمهم لأول مرة فى عالم كرة القدم…

المنتخب الهولندى زى ما قدم لنا حارس المرمى أندريس نوبرت اللى لعب أول مباراة دولية فى مسيرته مع انطلاقة الطواحين فى النسخة دى من كأس العالم، قدم لنا برضه مهاجم شاب جديد بيكتب التاريخ فى المونديال…

كودى ماتياس جاكبو، اتولد فى إيندهوفن فى هولندا سنة 1999 عمره النهاردة 23 سنة، ورغم إنه بيلعب فى مركز الجناح، بيشارك مع منتخب هولندا فى مركز رأس الحربة…

بدأ جاكبو مسيرته فى نادى إيندهوفن الهولندى ولعب للفريق الأول من 2018، ولعب لحد دلوقتى 106 مباراة وسجل 36 هدف، وفى النسخة الأخيرة من الدورى الهولندى حصل على جايزة أفضل لاعب…

جاكبو بدأ رحلته الدولية مع المنتخب الهولندى فى كل المراحل السنية، ولعب للمنتخب الأول من الموسم اللى فات، ولعب لحد دلوقتى 11 مباراة وسجل 5 أهداف…

جاكبو مبقاش بس صاحب أول هدف هولندى فى النسخة دى من المونديال، ولا قاد بس الطواحين الهولندية للدور التانى من كأس العالم فى نسخته الـ22، ده كمان حقق إنجاز تاريخى بيحصل لأول مرة…

النجم الهولندى الشاب، بقى أول لاعب فى تاريخ الطواحين يسجل فى أول 3 مباريات فى نسخة واحدة من كأس العالم، رغم إن المنتخب ده عدى عليه نجوم وأساطير كبيرة جدا…

مسيرته مع أيندهوفن بدأت بس من 2015 ولحد دلوقتى، لكنه أصبح هدف لكل الأندية الكبيرة فى أوروبا، وفى أكتر من فريق بيسعى لضمه خلال فترة الانتقالات الشتوية اللى جاية…

أندية كتير بتسعى لضم جاكبو خلال يناير اللى جاى، وأهمها الأندية الإنجليزية، ومن كتر التقارير اللى بتتكلم عن الموضوع، جاكبو شخصيا رد على الكلام ده وقال، إنه شىء جميل إنه يسمع عن العروض الإنجليزية دى، لكنه مركز بنسبة 100% على كأس العالم بس…

التقارير أكدت إن أقرب نادى لضم جاكبو من إيندهوفن هو مانشستر يونايتد، واللى عاوز يضمه علشان يكون خليفة كريستيانو رونالدو اللى فسخ عقده مع النادى بالتراضى..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى