منتخب مصر للسيدات أعلن اليوم بشكل مفاجئ انضمام لاعبة مصرية تُسمى سارة إسماعيل لأول مرة لتمثيل الفراعنة، وبالبحث اللعيبة دي تبين إنها كانت كابتن فريق سيدات نادي برشلونة وكمان لعبت في الدوري الإنجليزي للسيدات، مين بقا سارة إسماعيل دي؟
سارة إسماعيل ظهرت مع فريق سيدات وادي دجلة وهي عندها 17 عام، وتشارك بشكل أساسي مع الفريق الأول علطول عشان تلفت الأنظار مش بس جوا مصر لكن في إفريقيا بالكامل.
وبعد 4 سنين من لعبها مع الفريق الأول لوادي دجلة، فرصة العمر جت لسارة إسماعيل بعد ما أبدى نادي ستوك سيتي اهتمامه بالتعاقد معاها عشان تبقى على أعتاب فرصة إنها تكون أول لاعبة عربية تحترف في الدوري الإنجليزي، الأقوى في العالم وهي مفوتتش الفرصة ولا نادي وادي دجلة ضيع عليها الفرصة دي.
سارة إسماعيل انتقلت لنادي ستوك سيتي وهي عندنا 21 سنة، وقدامها تجربة وحيدة عايزة تمشي على خطاها وهي تكرار تجربة محمد صلاح في ملاعب إنجلترا، عشان تبقى نيفرتيتي الكرة المصري زي ما كان صلاح هو أفضل من يمثل مصر كفرعون أول للكرة المصرية.
سنتين بس وبعد كدا اتنقلت سارة إسماعيل لواحد من أكبر الأندية في العالم، نادي برشلونة مستغلة فكرة إنها من أب مصري وأم إسبانية، وعندها قدرة على الكلام باللغة الإسبانية بطلاقة ودا سهل مهمتها في الانضمام لنادي برشلونة.
سارة إسماعيل قدمت مستويات ممتازة مع نادي برشلونة وأظهرت شخصية عظيمة، خلت النادي يختارها تكون كابتن فريق السيدات للفريق الأول في برشلونة عشان تواصل كتابة التاريخ للكرة المصرية في الملاعب الأوروبية لكن في كرة السيدات المرة دي.
سارة إسماعيل كان عندها فرصة تمثل منتخب إسبانيا لكنها فضلت إنها تنتظر تكوين منتخب الكرة النسائية المصري واستدعائها، ودا اللي حصل إنهاردة بالفعل عشان تختار بدون تردد تمثيل منتخب مصر في المرحلة اللي جاية.
وبكدا فيبقى عندنا نجمة كبيرة من كرة القدم المصري بتكتب التاريخ في الملاعب العالمية، ووصلت إنها بقت كابتن واحد من أكبر فرق العالم عشان ترفع راية مصر عالية في الملاعب الإسبانية، وتكون خير ممثل لكرة القدم النسائية في مصر.
